U Kitai złavili 22-hadovaha biełarusa ź vializnaj partyjaj kakainu. Jamu pahražaje śmierć
31 lipienia ŭ šanchajskim aeraporcie zatrymali hramadzianina Biełarusi. Jon vioz nie mienš za 1,8 kiłahrama kakainu.
Pa infarmacyi «Našaj Nivy», chłopca zavuć Andrej, jamu 22 hady.
Biełarus lacieŭ u Šanchaj rejsam avijakampanii AirAsia. Jon vypraviŭsia ź Zimbabve, mieŭ pierasadku ŭ stalicy Efiopii Adys-Abiebie.
U kitajskim aeraporcie chłopiec nakiravaŭsia pa kanale dla tych, kamu niama čaho dekłaravać, paviedamlaje shanghai.gov.cn. Ale ž mytniki zaŭvažyli ŭ biełarusa dziŭny bahaž: čatyry ciopłyja zimovyja kurtki.
Aficer mytni ŭspomniŭ pra vypadak u Makaa. Tamtejšyja śpiecyjalisty vyjavili novy mietad kantrabandystaŭ: adzieńnie vymačvali ŭ rastvory vady i narkotykaŭ. Kurtki biełarusa pravieryli — i sapraŭdy znajšli ślady parašku. Heta byŭ kakain, ahulnaja vaha — bolš za 1800 hramaŭ.
Paśla dopytu padazravany pryznaŭsia, što jon pahadziŭsia dastavić kurtki ź Zimbabve praz Šanchaj u Makaa, pry ŭmovie, što jamu zabiaśpiečać transpartnyja vydatki i zapłaciać $1000 uznaharodžańnia. Mužčyna pavinien byŭ atrymać dalejšyja instrukcyi paśla prybyćcia ŭ Makaa.
Biełarusa źmiaścili pad vartu. Jamu pahražaje pažyćciovaje źniavoleńnie ci navat śmiarotnaje pakarańnie.
«Ciapier chłopiec znachodzicca ŭ šanchajskim izalatary časovaha ŭtrymańnia. Konsulstva prymaje ŭsie miery, nieabchodnyja dla abarony pravoŭ i intaresaŭ hramadzianina Biełarusi», — paviedamiŭ «Našaj Nivie» Anatol Hłaz, pres-sakratar MZS Biełarusi.
