«Standarty pryhažości dyktuje mienšaść? Heta niapravilna». U Biełarusi raspačaŭsia prajekt «Karaleva XL»
Vynikam prajektu stanie ŭdzieł piaci biełarusak u mižnarodnym konkursie pryhažości Top of the World Plus Size. Konkurs dla žančyn, čyj pamier adzieńnia bolšy za 46, adbudziecca ŭ Kijevie ŭ listapadzie.
Dyrektaram konkursu «Karaleva XL» stała madel plus-size Jaŭhienija Ciulenieva, jakaja ŭ 2017 hodzie atrymała tytuł vice-mis śvietu na konkursie, jaki adbyvaŭsia ŭ Sinhapury.
Jaŭhienija Ciulenieva.
Jana raskazała «Našaj Ninie»:
«U Biełarusi lišniuju vahu majuć 60% ludziej. U hety ž čas standartam pryznanaja fihura mienšaści, heta niapravilna. Kab mieć takuju fihuru, biełaruskija žančyny prykładajuć tytaničnyja namahańni i časta canoj ułasnaha zdaroŭja. Tamu zadačaj prajektu źjaŭlajecca nie tolki pieramoha ŭ konkursie, ale i pryciahnieńnie ŭvahi hramadstva da prablem i stereatypaŭ, ź jakimi sutykajucca žančyny sa źniešnaściu, dalokaj ad hlancavych standartaŭ. Prajekt ni ŭ jakim razie nie prapahanduje niezdarovaje charčavańnie i adsutnaść sportu. Naadvarot, my chočam dakazać, što siarod mažnych jość šmat paśpiachovych, uvažlivych da svajho zdaroŭja, realizavanych ludziej», — dzielicca Jaŭhienija Ciulenieva.
Zajaŭku na ŭdzieł u konkursie možna padać, skarystaŭšysia admysłovaj formaj na sajcie.
«Kali vam ad 20 da 40 hadoŭ i vy nosicie pamier adzieńnia bolšy za 46, to abaviazkova sprabujcie svaje siły ŭ konkursie. Taksama buduć aceńvać žyćciovuju historyju, prafiesijny dośvied i zadačy, jakija stavić pierad saboj udzielnica. Plusami buduć dobraja anhlijskaja mova, charyzma, fotahieničnaść i ŭmieńnie trymacca na scenie», — dadaje Jaŭhienija Ciulenieva.
