Navalny zaklikaŭ padtrymać kamunistaŭ, kab «Adzinaja Rasija» atrymała mienš hałasoŭ
Rasijski apazicyjanier Alaksiej Navalny i jaho Fond baraćby z karupcyjaj apublikavali imiony kandydataŭ, jakich jany prapanujuć padtrymać 8 vieraśnia na vybarach u maskoŭski parłamient.
Śpis apublikavany ŭ ramkach stratehii «Razumnaha hałasavańnia» — taktyki, jakaja, na dumku apazicyjaniera, zmoža pamienšyć u maskoŭskim parłamiencie kolkaść kandydataŭ, jakich padtrymlivaje «Adzinaja Rasija». Vybarščyku treba ŭvieści adras prapiski na sajcie, i jon atrymaje imia kandydata, za jakoha prapanuje prahałasavać Navalny.
Najbolšuju vyhadu ad «Razumnaha hałasavańnia» atrymaje kamunistyčnaja partyja — za pradstaŭnikoŭ hetaj partyi Navalny prapanuje hałasavać u 33 z 45 akruh.
«Razumnaje hałasavańnie» — heta prydumanaja prychilnikami Navalnaha technałohija, jakaja, na ich dumku, dazvolić vybarščykam, u jakich niama svaich kandydataŭ (bolšaść apazicyjnych kandydataŭ nie byli zarehistravanyja na vybarach) addać svoj hołas kamu-niebudź z kandydataŭ tak, kab kandydat ad ułady nabraŭ jak maha mienš hałasoŭ.
Fond Navalnaha prapanuje addavać svoj hołas tamu, chto, na dumku technołahaŭ, maje najbolšyja šancy pieramahčy kandydata, padtrymanaha meryjaj. Jak mienavita jany ličyli hetyja šancy, nie ŭdakładniajecca.
Ekśpierty fondu Navalnaha, praanalizavaŭšy śpisy ŭsich zarehistravanych kandydataŭ, pryjšli ŭ vyniku da vysnovy, što ŭ bolšaści akruh šancy pieramahčy kandydataŭ ad ułady jość u kamunistaŭ.
«Razumnaje hałasavańnie» stała abjektam krytyki, u tym liku i ad ludziej, jakija simpatyzujuć Navalnamu. Michaił Chadarkoŭski nazvaŭ zdradaj hałasavańnie za kandydataŭ, jakija «nie zajaŭlajuć vyrazna svaju pazicyju suprać represij i palityčnaha vykarystańnia kryminalnaha pieraśledu». Zamiest hetaha jon zaklikaŭ pratestavać suprać fakta samich vybaraŭ i psavać biuleteni, kali ŭ ich niama adpaviednych kandydataŭ.
Navalny ŭ kancy žniŭnia na svaim sajcie prakamientavaŭ samyja raspaŭsiudžanyja pretenzii da «Razumnaha hałasavańnia». Jon pryznaŭ, što sistema nie źjaŭlajecca idealnaj, ale nazvaŭ jaje aptymalnaj u isnujučych umovach.