Zatrymany były kiraŭnik Pamiežnaj achovy Łatvii
Biuro ŭnutranaj biaśpieki zatrymała byłoha kiraŭnika Pamiežnaj achovy Łatvii Normunda Harbarsa, paviedamlaje Delfi sa spasyłkaj na Leta.
Adznačajecca, što razam z Harbarsam zatrymanyja dvoje pradstaŭnikoŭ firmy, jakaja zajmajecca darožnym budaŭnictvam. Śledstva padazraje, što mieli miesca złačynstvy ŭ chodzie rabot pa ŭźviadzieńni infrastruktury na prymiežnaj pałasie z Rasijaj i Biełaruśsiu. Havorka idzie pra mahčymaje parušeńnie techničnych patrabavańniaŭ, samavolnaj vysiečcy lesu i admyvańni hrošaj.
50-hadovy Harbars uznačalvaŭ Pamiežnuju achovu Łatvii z 2009 hoda. U 2016 hodzie ŭrad padoŭžyŭ termin jaho paŭnamoctvaŭ da 2021 hoda, adnak, dasiahnuŭšy ŭzrostu piensii pa vysłuzie hadoŭ, jon u studzieni 2019 hoda vyrašyŭ padać u adstaŭku.
Raniej tahačasny ministr unutranych spraŭ Rychard Kazłoŭskis adznačaŭ, što Harbars unios vialiki ŭkład u raźvićcio pamiežnaj słužby. Pad jaho kiraŭnictvam byli paśpiachova realizavany miery pa ŭzmacnieńni achovy miežaŭ, łatvijskija pamiežniki ŭdzielničali ŭ mnohich mižnarodnych apieracyjach.
