U sadku na Kalinoŭskaha ŭ Minsku zapracavała roznaŭzrostavaja biełaruskamoŭnaja hrupa. Baćki vielmi zadavolenyja
Pra płany adkryć roznaŭzrostavuju biełaruskamoŭnuju hrupu ŭ minskim sadku №210 baćki paviedamlali jašče ŭ krasaviku.
Ciapier novuju hrupu naviedvajuć 9 dziaciej.
«Učora byŭ pieršy dzień, baćki vielmi zadavolenyja i vychavacielkami (abiedźvie cudoŭna viedajuć biełaruskuju movu, kamunikujuć vydatna), i ŭmovami — u pamiaškańni zrabili dobry ramont», — raskazvaje Volha Kavalčuk, jakaja była adnoj ź inicyjatarak stvareńnia hrupy.
Ilustracyjny zdymak. Fota Siarhieja Hudzilina.
Da hrupy jašče možna dałučycca — nakiravańni buduć vydavacca ŭvieś vierasień. Ale dla hetaha treba stajać na čarzie ŭ sadok u Pieršamajskim rajonie.
«Viedaju, što ŭžo z susiednich hrup jość žadajučyja pieravieścisia. I ruskamoŭnyja baćki chočuć, kab ich dzieci patrapili ŭ hetu hrupu, bo tam stvorany dobryja ŭmovy», — dzielicca Volha.
Adkryćcio novaj biełaruskamoŭnaj hrupy nie abyšłosia biez skandału. Sprava ŭ tym, što ŭ 210-m sadku ŭžo pracavała hrupa, dzie navučańnie viałosia na rodnaj movie, i baćki, čyje dzieci chadzili tudy, pieražyvali, što jaje raspuściać.
U vyniku isnujučuju hrupu nie rasfarmiravali. Dzieci zajmajucca ŭ tym ža pakoi. Ale vychavacielek im dali novych, a raniejšych pieraviali ŭ novuju hrupu.
Dla tych baćkoŭ, chto chacieŭ by, kab dzicia navučałasia ŭ sadku na rodnaj movie, Volha tłumačyć ałharytm dziejańniaŭ. Dla pačatku treba znajści takich ža achvotnych siarod inšych: dla adkryćcia roznaŭrostavaj hrupy patrebna minimum 12 dziaciej, kali adnaho ŭzrostu — 20. Paśla skłaści kalektyŭnuju zajavu i adnieści va ŭpraŭleńnie adukacyi administracyi rajona.
«Heta nieabchodna zrabić da novaha hoda. Naprykład, kali vy źbirajeciesia addać dzicia ŭ sadok vosieńniu 2020-ha, to nie paźniej za śniežań treba padać zajavu», — raić žančyna.
