Pratestoŭcy suprać akumulatarnaha zavoda vyłučyli kandydatam u deputaty lidara apazicyi
Miascovy apazicyjny lidar — Alaksandr Kabanaŭ z Abjadnanaj hramadzianskaj partyi — stanie kandydatam u deputaty Pałaty pradstaŭnikoŭ. Takoje rašeńnie pryniali žychary horada, jakija zmahalisia suprać adkryćcia ŭ svabodnaj ekanamičnaj zonie «Brest» akumulatarnaha zavoda. Zmahalisia i, faktyčna, dasiahnuli pośpiechu.
Čytajcie taksama: Fiermier Kabanaŭ z Brestčyny — vialikaja hutarka
Kabanaŭ maje namier bałatavacca ŭ vybarčaj akruzie № 1 Bresta. U jaho kamandu ŭvojduć aktyvisty antyakumulatarnaj inicyjatyvy Dziamjan Lepiasievič i Dźmitry Biekaluk.
Zbor podpisaŭ budzie prachodzić u formie pikietaŭ amal štodnia ŭ niekalkich punktach horadu, raskazaŭ radyjo «Svaboda» Kabanaŭ. Jon zaprasiŭ praciŭnikaŭ zavoda ŭvachodzić va ŭčastkovyja vybarčyja kamisii i stanavicca naziralnikami na vybarach.
Prablema ŭ tym, što naziralniki na biełaruskich vybarach nijak nie mohuć prasačyć sumlennaść padliku hałasoŭ, a vybarčyja kamisii farmirujucca łukašenkaŭskaj viertykallu.
«Hramadskaja kampanija suprać akumulatarnaha zavoda, jakaja pačałasia jašče ŭ studzieni 2018 hodu, pakazała, što jość šmat prablem, u tym liku ekałahičnych, jakija treba vyrašać na zakanadaŭčym uzroŭni, kab zakony byli vyraznyja, zrazumiełyja i kab ich niemahčyma było traktavać advolna, chto jak zachoča», — zajaviŭ Kabanaŭ.
Kabanava nie raz štrafavali i zatrymlivali za ŭdzieł u pratestach. Na jaho navat sprabavali paviesić kryminalnuju spravu, jak i na jašče adnaho błohiera-pratestoŭca — Siarhieja Piatruchina.
Suprać zavoda ŭźnialisia žychary susiednich viosak i mikrarajonaŭ — Telmy, Stymava i Šebryn, a taksama žychary inšych rajonaŭ Bresta.
Čytajcie taksama: Kryminalnuju spravu suprać bresckaha błohiera Kabanava spynili. Za 4 miesiacy nie znajšli składu złačynstva
