Daśledčyca biełaruskaha falkłoru viartajecca z ZŠA ŭ Biełaruś, kab lačycca ad ciažkaj chvaroby, i źbiraje hrošy na leki
Režysiorka filma «Pieśni staroj Jeŭropy» Vola Dziemka prosić dapamahčy sabrać hrošy dla kursa płazmaterapii.
Biełaruskaja falkłarystka i śpiavačka Vola Dziemka žyvie ŭ ZŠA, ale i tam praciahvaje papularyzavać biełaruski fołk. Niekalki hadoŭ tamu pa vynikach svajoj ekśpiedycyi na Paleśsie jana vypuściła film «Pieśni staroj Jeŭropy», u jakim raspaviadaje pra źnikajučyja piesiennyja tradycyi biełarusaŭ. Ciapier Volzie patrebnaja dapamoha.
«Pryjšli vyniki bijapsii, jakaja padćvierdziła vielmi redkaje i nadzvyčaj ahresiŭnaje aŭtaimunnaje zachvorvańnie, u paraŭnanni ź jakim navat vaŭčanka lečycca krychu lahčej. Ja zaraz prymaju niejkija atamnyja dozy lekaÿ, i my nibyta zdoleli zapavolić abvastreńnie, ale pokul nie možam spynić jaho całkam. Nastupnym krokam (kali zdolejem mianie stabilizavać) płanujem jak maha chutčej ekspartavać mianie ŭ Minsk na kurs płazmaterapii, jakaja u štatach kaštuje niejkich prosta astranamičnych hrošaj», — piša Vola ŭ svaim fejsbuku.
Kab dapamahčy sabrać hrošy, jana prapanuje achvotnym zamović u jaje dyski ź filmam «Pieśni staroj Jeŭropy». Padrabiaznaja infarmacyja pra zamovu — pa spasyłcy.
Kadr ź filma «Pieśni staroj Jeŭropy». Hurt «Žuraŭka» v. Ivanava słabada Lelčyckaha r-na
Heta pieršy anhłamoŭny dakumientalny film, jaki apaviadaje pra biełaruskija śpievy. Dla jaho Vola zdymała paleskich tradycyjnych vykanaŭcaŭ u 2011-m, a potym amal piać hod darablała film: brała kamientary ekśpiertaŭ, rabiła animacyju, zajmałasia mantažom… U filmie zhadvajucca značnyja daty biełaruskaj historyi, apaviadajecca, jak pieśni źbierahlisia skroź stahodździ, jak adroźnivajucca ad rehijonu da rehijonu, pra što ŭ ich piajecca. Hałoŭnyja hieroi «Pieśni staroj Jeŭropy» — viaskoŭcy z Tonieža, Ivanavaj Słabady i Stadoličaŭ Lelčyckaha rajona, Dziatłavičaŭ Łuninieckaha, Staroha siała pad Žabinkaj. Niekatorych ź ich užo niama siarod žyvych. Ich śpievy supravadžajuć kamientary ekśpiertaŭ — etnamuzykołahaŭ Tamary Varfałamiejevaj i Darynki Šapavałavaj, daśledčyc Lubovi Sivuravaj i Hanny Silivončyk, Viktoryi Michno z hurta «Huda», Aleha Chamienki z «Pałaca», Ivana Kirčuka z «Trojcy».
U apošniaj častcy filma, «Pieśni siońnia», možna pabačyć frahmienty vystupaŭ hurtoŭ-pierajmalnikaŭ aŭtentyčnaj maniery vykanańnia i tych, chto pierapracoŭvaje falkłor, sumiaščaje ź inšymi stylami muzyki. Fihuruje tam i hurt biełaruskich śpievaŭ VOLYA, stvorany Volaj Dziemkaj u Sietle.
Film vielmi jarki, zachoplivaje hledača i nie adpuskaje da samaha kanca (a idzie roŭna hadzinu). Robiačy «Pieśni staroj Jeŭropy», Vola aryjentavałasia na dramaturhiju navukova-papularnych stužak VVS i spadziavałasia, što jaje tvor paspryjaje viadomaści Biełarusi ŭ śviecie. Tak i atrymałasia: film udzielničaŭ u šerahu fiestyvalaŭ i ŭziaŭ šmat uznaharod.
Aproč taho stvoranaja admysłovaja staronka dla danataŭ, kudy možna pieraličvać hrošy dla Voli.