Na asfaltabietonnych zavodach narakajuć na nizkuju jakaść bitumu z Mazyra — recha pastavak niajakasnaj nafty?
Jak stała viadoma «Našaj Nivie», prynamsi na adnym bujnym asfaltavym zavodzie ŭźnikli prablemy ź jakaściu bitumu, jaki pastaŭlaje Mazyrski NPZ.
Pra heta paviedamili supracoŭniki siaredniaha źviana.
Jany schilnyja źviazvać heta z tym, što mienavita ŭ Mazyr išła kiepskaja nafta z Rasii: maŭlaŭ, voś na «Naftanie» takoj prablemy niama, bo toj brudnuju naftu prymać nie staŭ, i blizki da jaho Naftabitumny zavod jaje taksama nie atrymlivaŭ.
Darožny bitum u vykarystańni
Tut treba skazać, što jakaść bitumu vyznačajecca pa niekalkich charaktarystykach, hałoŭnaja ź jakich — pienietracyja, jana dazvalaje vyznačyć ćviordaść bitumu. Kali kazać pra darožnuju śpiecyfiku, to čym bolš — tym lepš, bo ŭ budaŭničych, izalacyjnych i inšych bitumach svaje kryteryi jakaści.
Sens atrymanaj nami infarmacyi ŭ tym, što pry zamovie z Mazyra bitumu marki «70/100» (u naźvie marki druhoj ličbaj adrazu i paznačajecca pienietracyja) pryjšło nieviadoma što.
Voś pašpart pastaŭlenaj pradukcyi
Maŭlaŭ, bitum byŭ kiepski i vizualna, i pa pachu. Tamu było vyrašana adpravić jaho na ekśpiertyzu ŭ adzin ź dziaržaŭnych instytutaŭ. Adkaz paćvierdziŭ padazreńni — pa asnoŭnaj charaktarystycy jakaść bitumu była dalokaj ad dekłaravanaj.
A čamu bitum ź nizkaj pienietracyjaj — heta kiepska?
Ličycca, što marka «50/70» (da jakoj bližej za ŭsio pastaŭleny na zavod bitum) horaj prajaŭlaje siabie ŭ budučyni — daroha z takoha asfaltu bolš schilnaja da raskolin zimoj.
Aryhinały dakumientaŭ z podpisami adkaznych asob jość u Redakcyi
Krynicy «Našaj Nivy» vykazali zdahadku, što kiepskaja nafta tut moža być ni pry čym.
Maŭlaŭ, niadaŭna Mazyrski NPZ znajšoŭ ahienta ŭ Rumynii, kudy pačaŭ pastaŭlać bitum.
Ale rumyny zamaŭlajuć nie «70/100», a bitum nižejšaj jakaści.
Pry hetym, śćviardžajuć krynicy, bitum dla pastavak na roznyja zavody zamiešvajecca ŭ adnoj jomkaści. Ačyścić jaje całkam ad «papiaredniaha» bitumu niemahčyma, tamu ŭ vyniku nastupnaja partyja pieramiešvajecca z reštkami bitumu nižejšaj jakaści — i vychodzić takaja situacyja.
Na zavodzie takoje rezka admaŭlajuć.
«U nas nijakich prablem niama! Usio ŭ adpaviednaści ź instrukcyjami, a pašparty vypisvajucca tolki na jakasnyja naftapradukty! Kali jość dokazy, chaj kampanija z dakumientami hetymi źvierniecca da nas u vyznačanym paradku», — adkazaŭ «Našaj Nivie» adzin z kiraŭnikoŭ Mazyrskaha NPZ.
Admietna, što pakryŭdžany bok tak rabić, vyhladaje, nie budzie — rabotniki kažuć, što vyšejšyja mieniedžary bajacca apubličvać infarmacyju, kab nie psavać adnosiny ź dziaržaŭnym pastaŭščykom.
Varta skazać, što z takoj prablemaj sutyknuŭsia pakul što tolki adzin zavod z abzvonienych nami. Ale tam ekśpiertyz nie pravodzili: kažuć, što daviarajuć pastaŭščyku.
