Psieŭdapamočnik deputata Pałaty pradstaŭnikoŭ: ŁHBT-supolnaść robić z našych dziaciej maralnych vyradkaŭ
Na sajcie «Viačerni Mahiloŭ» źjaviŭsia list ad imia «siabroŭ Hramadskaj pałaty sajuznaj dziaržavy», u im jany vykazvajuć padtrymku vydańniu. Hazieta «Viačerni Mahiloŭ» atrymała viadomaść dziakujučy šmatlikim vypadam u adras ŁHBT-supolnaści. Hetyja vypady byli nastolki źnievažalnymi, što reahavać daviałosia navat Ministerstvu infarmacyi, prymianiajučy karnyja miery.
Pa słovach pradstaŭnikoŭ Hramadskaj pałaty, u ich składvajecca ŭražańnie, što z dapamohaj Leninskaha RAUS Mahilova, Ministerstva infarmacyi i inšych dziaržorhanaŭ Biełarusi «adbyvajecca nieaściarožnaja padmiena paniaćciaŭ i skažeńnie sensaŭ». A mienavita «napampoŭvańnie imidžu pradstaŭnikoŭ ŁHBT supolnaści jak asablivych pradstaŭnikoŭ pryvilejavanaj supolnaści, pačućcio nieprymańnia da jakich źjaŭlajecca apryjory niepravamiernym».
Andrej Łapacki. Fota facebook.com.
List padpisaŭ Andrej Łapacki ad «ad imia i pa daručeńni siabroŭ Hramadskaj pałaty Sajuznaj dziaržavy». Składvajecca ŭražańnie, što ŭsia pałata daručyła Łapickamu zrabić taki zvarot.
A ŭ skład Hramadskaj pałaty ŭvachodziać samyja roznyja ludzi: piśmieńnik Čarhiniec, śpiavak Jarmolenka, mufcij Šabanovič, barec Miadźviedź, kasmanaŭt Klimuk.
Na spravie ž vyśvietliłasia, što zvarot padpisała ŭsiaho šeść čałaviek.
Aproč Łapackaha, list padpisaŭ, naprykład, pradstaŭnik «Instytuta krain SND» Mikałaj Siarhiejeŭ (blizki da «Rassupracoŭnictva»). Heta ŭžo nie pieršy vypadak, kali ad imia ŭsioj pałaty raspaŭsiudžvajucca tyja ci inšyja palityčnyja zajavy. Naprykład, była situacyja, što pradstaŭniki hetaj struktury vykazalisia suprać ukrainskaj aŭtakiefalii, nasamreč ža akazałasia, što bolšaść siabroŭ byli ni snom ni ducham pra hetuju zajavu.
My źviazalisia z aŭtaram lista Andrejem Łapackim, kab jon nam patłumačyŭ svaju pazicyju.
«Nas pabudziła nieabyjakavaja pazicyja. Bo my da kanca nie možam zrazumieć, jakaja pazicyja dziaržavy, jakaja pazicyja ŭ ludziej. Idzie padmiena paniaćciaŭ, i hetaja padmiena paniaćciaŭ nas chvaluje», — pačynaje apovied spadar Łapacki.
«Kožny čałaviek maje prava na taki ład žyćcia, jaki jon ličyć dla siabie metazhodnym, kali hety ład žyćcia nie zaminaje tym ludziam, jakija jaho akalajuć.
Jość vializnaja kolkaść ludziej, jakaja viadzie asablivy ład žyćcia. Niechta chodzić na bajdarkach, chtości źbiraje marki, chtości — pčalaryć. Jany abjadnoŭvajucca ŭ supołki, ale nie pierakonvajuć inšych, što ich supołki asablivyja ŭ paraŭnańni ź inšymi.
Jość bolšaść i mienšaść pa lubych pytańniach. Vyraz «zdarovaja bolšaść» ja ŭziaŭ u dvukośsi. Zdarovaja z punktu hledžańnia marali. Bolšaść ludziej, jakija pražyvajuć u Biełarusi, maralna ŭstojlivyja z hledžańnia biblejskich i nie tolki kaštoŭnaściaŭ, razumiejuć, što takoje hrech (i z relihijnaha, i ahulnaha hledžańnia), što takoje «dobra» i što takoje «kiepska».
Z našaha hledzišča, toje, čym zajmajecca ŁHBT-supolnaść — heta kiepska. Z hledzišča bolšaści ludziej — heta nie adpaviadaje normam marali, jakich my prytrymlivajemsia. My ličym, što ich dziejańni razmyvajuć tuju maral, jakaja isnuje ŭ našym hramadstvie spakon viakoŭ.
Z takimi ludźmi treba pracavać, treba tłumačyć: kali ty pastupaješ amaralna, to hramadstva nie prymaje takija ŭčynki i dziejańni. Heta chryścijanskaja pazicyja.
Ja ž nie chadžu i nie raskazvaju, što ja siońnia spaŭ z žančynaj, a zaŭtra budu spać z mužčynam, a pazaŭčora ŭ mianie pryšč uskačyŭ na nazie. Ja ž nie raskazvaju padrabiaznaści svajho intymnaha, ci fizijałahičnaha žyćcia. I mianie absalutna nie cikavić, ci spaŭ jon z mužčynam, ci jana z žančynaj. Mnie nie padabajecca, što heta vynosicca na hramadskaje abmierkavańnie, kab usie pra heta viedali. Rabi, što chočaš, u nas volnaja kraina, ale kali ty heta vypiačvaješ, to ja maju prava skazać, što heta kiepska.
Apošnim časam mnie takaja prapahanda časta traplajecca, niejki čas ja na heta nie źviartaŭ uvahi. Kali raskazvać ź dziacinstva, što heta maje miesca być, hučna kazać, što heta dobra, to našy dzieci vyrastuć maralnymi vyradkami.
«NN»: Vy nazyvajecie pradstaŭnikoŭ ŁHBT-supolnaści «maralnymi vyradkami»?
AŁ: Vychodzić, što tak. Ja prapanuju dzieciam dakładna kazać, što takoje «dobra», što takoje «kiepska», što takoje «hrech». I ja maju prava heta kazać. Isnuje maral hramadstva, u jakim ty žyvieš. Ja kažu ad bolšaści hramadstva, jakoje statystyčna paćvierdžanaje.
Chto taki hety Andrej Łapacki? Na sajcie Hramadskaj pałaty napisana, što jon źjaŭlajecca pamočnikam deputata Pałaty pradstaŭnikoŭ. My ŭdakładnili ŭ spadara Łapackaha, u kaho mienavita. «Na hramadskich pačatkach ja pamočnik u deputata Michaiła Miłavanava», — adkazaŭ Łapacki.
My patelefanavali deputatu Miłavanavu, kab vyśvietlić, ci dapamahaje jamu Łapacki.
«NN»: Michaił Viačasłavavič, Andrej Łapacki źjaŭlajecca vašym pamočnikam?
Michaił Miłavanaŭ: Nie.
«NN»: I nikoli nie byŭ?
MM: Nie.
«NN»: Jon pradstaviŭsia vašym pamočnikam.
MM: Nie-nie-nie, niama ŭ mianie takoha pamočnika.
«NN»: I navat na hramadskich pačatkach?
MM: Nie, ja dobra pomniu svaich pamočnikaŭ.
Taksama na sajcie pałaty paznačana, što Łapacki ŭznačalvaje pryvatnaje pradpryjemstva «Praktyčnyja sistemy». Heta inžynirynhavaja kantora. Infarmacyi pra dziejnaść ustanovy minimum. U pačatku 2019 hoda «Praktyčnyja sistemy» značylisia ŭ liku płacielščykaŭ, jakija majuć pazyki pa spłacie padatkaŭ.
«Hramadskaja pałata Sajuznaj dziaržavy Biełarusi i Rasii» ŭtvoranaja ŭ 2017 hodzie Minsku, u jaje skład uvajšli viadomyja ŭ Biełarusi i Rasii asoby: relihijnyja dziejačy, palityki, spartsmieny, kasmanaŭty. Usiaho bolš za 200 čałaviek. Ofis arhanizacyi znachodzicca ŭ Maskvie.
