Andrejčanka pra admienu śmiarotnaha pakarańnia: My pracujem nad hetym
Pra heta zajaviŭ 7 žniŭnia staršynia Pałaty pradstaŭnikoŭ Uładzimier Andrejčanka na sustrečy z kiraŭnicaj pradstaŭnictva Eŭrapiejskaha źviazu ŭ Biełarusi Andrea Viktaryn, piša radyjo «Svaboda».
Źviartajučysia da jaje, Uładzimier Andrejčanka skazaŭ, što spadarynia Viktaryn musić vykanać dźvie rečy, zaplanavanyja na sioletniuju vosień:
«Pa-pieršaje, vy abiacali padpisańnie damovy ab spraščeńni vizavaha režymu (adzin z parahrafaŭ damovy praduhledžvaje źmianšeńnie koštu šenhienskaj vizy dla biełarusaŭ ź ciapierašnich 60 eŭra da 35). Pa-druhoje, my čakajem vizytu ŭ Miensk ministra zamiežnych spraŭ Eŭraźviazu Federyki Maheryni».
«Zaraz vy zakančvajecie svaju pracu ŭ Biełarusi, paśla čaho pierajedziecie na hetkuju ž samuju pasadu ŭ Armenii. U kastryčniku ja budu ŭ Jerevanie na mierapryjemstvach ADKB. Tak što vy ad mianie tam nie schavajeciesia» — pažartavaŭ Andrejčanka.
Na heta dyplamatka adkazała, što Eŭraźviaz zaŭždy trymaje svajo słova.
«Ja rasčyščała svoj pracoŭny stoł i źviarnuła ŭvahu na dakumenty ab supracy Eŭraźviazu i Biełarusi, padpisanyja ŭ 2014 i 2015 hadach. Dyk voś, absalutna ŭsie svaje abaviazańni Brusel vykanaŭ», — padkreśliła Andrea Viktaryn.
Kiraŭnica pradstaŭnictva Eŭrapiejskaha źviazu ŭ Biełarusi ŭ svaju čarhu ahučyła i pažadańni Brusela.
«Eŭrapiejcaŭ chvalujuć takija prablemy ŭ Biełarusi, jak pravy čałavieka, demakratyčnyja svabody, śmiarotnaje pakarańnie. My zacikaŭlenyja, kab Biełaruś stała svabodnaj, paśpiachovaj, demakratyčnaj krainaj.
My z zadavalnieńniem bačym, što ŭ Miensku raście zacikaŭlenaść prahramaj «Uschodniaje partnerstva». Asabliva čakajem zruchaŭ u pracesie admieny śmiarotnaha pakarańnia», — zajaviła Andrea Viktaryn.
Na heta Ŭładzimier Andrejčanka adreahavaŭ tak:
«My adkrytyja da razmovy ab admienie śmiarotnaha pakarańnia ŭ Biełarusi. My nad hetym pracujem.
Eŭraparlamentary pavinny razumieć, što my adkrytyja da raźvićcia stasunkaŭ, abmierkavańnia roznych temaŭ, u tym liku admieny śmiarotnaha pakarańnia. Ciapier rychtujem supolna z sakrataryjatam Rady Eŭropy vialiki seminar, jaki projdzie ŭ Miensku 27 žniŭnia. Ale nas nia treba padciskać, pryśpiešvać. Patrebien čas, i my vyjdziem na peŭnyja rašeńni ŭ hetaj prablemie».
