U ZŠA — najbujniejšaje za hod padzieńnie akcyj na Uoł-stryt
5 žniŭnia na Uoł-stryt adbyłosia najbolšaje ŭ 2019 hodzie padzieńnie kursaŭ akcyj, piša radyjo «Svaboda».
Na fonie abvastreńnia, handlovaha kanfliktu z Kitajem indeks S&P 500, u jaki ŭvachodziać 500 najbujniejšych amerykanskich kampanij upaŭ na 3%, indeks Dow Jones — na 2,9%, Nasdaq — na 3,5%.
Padzieńnie na Ŭoł-stryt adbyłosia paśla taho, jak Kitaj dazvoliŭ svajoj valucie (juaniu) upaści da ŭzroŭniu bolš za 7 juaniaŭ za 1 dalar. Heta było samaje značnaje patańnieńnie juania ŭ ramkach adnaho dnia za 10 hadoŭ. Prezydent ZŠA Donald Tramp adrazu ž abvinavaciŭ Kitaj u «manipulacyi valutaj», a ministar finansaŭ ZŠA Styvien Mnučyn zajaviŭ, što Vašynhton budzie supracoŭničać ź Mižnarodnym valutnym fondam dla likvidacyi niadobrasumlennaj kankurencyi z boku Pekinu.
Rasprodaž akcyj pačaŭsia pamiarkoŭnymi tempami 5 žniŭnia na biržach u Azii, adnak uzmacniŭsia z adkryćciom rynkaŭ u Eŭropie i dasiahnuŭ piku na amerykanskich finansavych biržach u kancy dnia. U pošukach biaśpieki investary skuplali dziaržablihacyi ZŠA, što, sa svajho boku, pryviało da padzieńnia ich dachodnaści da samaha nizkaha ŭzroŭniu za apošnija try hady.
Mnohija investary aścierahajucca ŭzmacnieńnia žorstkaści handlovaj vajny pamiž dźviuma krainami, pakolki hety kanflikt akazvaje vyrašalny ŭpłyŭ na hlabalny ekanamičny klimat. Na minułym tydni Donald Tramp pryhraziŭ uvieści dadatkovyja myty na kitajski impart u ZŠA na sumu kala 300 miljardaŭ dalaraŭ, što zakranuła b praktyčna ŭsie tavary z Kitaju, jakija impartujucca ŭ ZŠA. 5 žniŭnia stała viadoma, što Kitaj prypyniŭ zakupki sielskahaspadarčaj pradukcyi ZŠA.
