U handlovym centry «Dana Moł» nočču tušyli pažar
U noč na niadzielu, kala 2:15, zaharełasia ŭklučanaja ŭ elektrasietku fryciurnica ŭ kaviarni «Mama doma» na trecim paviersie handlova-zabaŭlalnaha centra Dana Mall, paviedamlaje BIEŁTA.
Jak raspavioŭ kiraŭnik ZTAA «Zomieks Inviestmient» Uładzimir Rafalski, spracavała sistema aŭtamatyčnaj pažarnaj sihnalizacyi, tamu dziažurny piersanał handlovaha centra vyjaviŭ uzharańnie chutka i adrazu ž paviedamiŭ apieratyŭnym padraździaleńniam MNS.
«Aŭtamatyčnaja sistema pažaratušeńnia łakalizavała zaharańnie, piersanał handlovaha centra taksama vykarystaŭ pieršasnyja srodki pažaratušeńnia. Tamu da momantu prybyćcia avaryjna-vyratavalnych padraździaleńniaŭ MNS ź Pieršamajskaha RANS zaharańnie było likvidavana ź minimalnymi nastupstvami», — adznačyŭ Uładzimir Rafalski.
Paciarpiełych u vyniku zdareńnia niama. Pryčyna ŭzharańnia vyśviatlajecca. Papiaredniaja viersija — parušeńnie pravił ekspłuatacyi elektraabstalavańnia: povar kafe zabyŭ vyklučyć fryciurnicu.
Handlovy centr praciahvaje pracu ŭ štatnym režymie.
