Elektrasamakat lacieŭ pa Arłoŭskaj 75 km/h. DAI dumaje, što z hetym rabić
U Minsku elektryčny samakat ruchaŭsia z rekordnaj chutkaściu — ažno 75 km/h — i patrapiŭ na kamieru fotafiksacyi. Niezvyčajny vypadak adbyŭsia 19 lipienia ŭ 21:04 pa vulicy Arłoŭskaj u Minsku.
Pra heta «Našaj Nivie» paviedamili ŭ arhanizacyi «Biaśpiečnyja darohi Biełarusi», jakaja zajmajecca fiksacyjaj faktaŭ parušeńnia chutkaści na darohach.
Heta piersanalny, a nie prakatny samakat. Jaho chutkaść nie abmiežavana błakiroŭkaj. Fota pradastaŭlena SZAT «Biaśpiečnyja darohi Biełarusi»
U arhanizacyi adznačajuć, što farmalna čałaviek na samakacie parušyŭ chutkasny režym. Na tym učastku, jak i na zvyčajnaj aŭtadarozie, abmiežavańnie chutkaści — 60 km/h. Praz hetaje parušeńnie i adsutnaść rehistracyjnych numaroŭ z samakatčykam budzie raźbiracca milicyja. Infarmacyja pieradadziena tudy.
«Raniej my fiksavali pieravyšeńnie chutkaści navat bronietransparcioram i rovaram, ale pieravyšeńnie chutkaści elektrasamakatam — pieršaje», — dadajuć u arhanizacyi.
DAI abiacaje ŭ najbližejšy čas skarektavać praviły darožnaha ruchu, dadaŭšy tudy asobnuju katehoryju «srodki piersanalnaj mabilnaści». U jaje buduć uvachodzić elektrasamakaty, siehvei i inšyja papularnyja techničnyja navinki.
Adnak pakul što elektrasamakaty znachodziacca pa-za pravavym polem. Na ich nie raspaŭsiudžvajucca praviły darožnaha ruchu, sfarmulavanyja dla miechaničnych transpartnych srodkaŭ, ni dla mapiedaŭ, ni dla viełasipiedaŭ.
Nie rehłamientavanyja miescy ich ruchu, dapuščalnaj chutkaści ŭ hetych miescach i adkaznaść za parušeńni.
Pry patencyjnaj vysokaj chutkaści samakat nijak nie abaznačany na darozie, u jaho niama lusterkaŭ zadniaha vidu i pavarotnikaŭ. Časam jaho prosta nie vidać.
Narešcie, na samakaty siadajuć u tym liku dzieci i ludzi biez pravoŭ, šlemami karystajucca redka, što bačna i ŭ hetym kankretnym vypadku.
Pieršaja raźbitaja hałava pry zachavańni hetaj anarchii — tolki sprava času.