Juryj Drakachrust: Čamu mianie nie ździviła intervju Dzialendzika «Našaj Nivie»
Uładzimier Dzialendzik u interviju «Našaj Nivie» vykazaŭ raspaŭsiudžanyja ŭjaŭleńni elity i narodu: «Što Pucinu pieraškadžaje prosta siabravać? Kali łaska ž, my supracoŭničajem, davajcie žyć, pracavać, miežy vašyja my abaraniajem, na adnoj movie razmaŭlajem», piša Jury Drakachrust na Svaboda.org.
Interviju vydatnaje i vielmi cikavaje, pavučalny dośvied biełaruskaha peryjadu pieršapačatkovaha nazapašvańnia kapitału 90-ch, acenki kalehaŭ pa biznesie.
«Alaksandr Ryhoravič, nie idzi na abjadnańnie z Rasijaj!» Ahniavoje intervju z ułaśnikam «Darydy», miljanieram Uładzimiram Dzialendzikam
Ale, u adroźnieńnie ad inšych, ja zusim nie ździviŭsia źmiestu vykazvańniaŭ hieroja interviju nakont niezaležnaści i rasiejskich intehracyjnych zalacańniaŭ. Forma — krychu ździviła. Siarod čynoŭnikaŭ i bujnych biznesoŭcaŭ nie pryniata tak vyrazna i rezka vykazvacca na hetyja temy.
Ale, pa sutnaści, Uładzimier Dzialendzik prosta vykazaŭ vielmi raspaŭsiudžanyja ŭjaŭleńni, jakija jość i siarod elity, i siarod narodu: «Što Pucinu pieraškadžaje prosta siabravać? Voś vy mnie adkažycie — što pieraškadžaje? Što, treba Saviecki Sajuz stvaryć znoŭ? Što, treba, kab my ŭ składzie Rasiei byli? Kali łaska ž, my supracoŭničajem, davajcie žyć, pracavać, miežy vašyja my abaraniajem, na adnoj movie razmaŭlajem».
I biez asablivych kulturnickich składanaściaŭ, biez hłybokich razvahaŭ pra nacyjanalnuju ideju, navat sa spałučeńniem reveransaŭ na adras biełaruskaj movy i kanstatacyjaj — «na adnoj movie razmaŭlajem».
Ź niemudrahielistaj takoj matyvacyjaj — dyk my ž biełarusy, my ž asobnyja, što tut jašče tłumačyć? Ale hetaja matyvacyja davoli ćviordaja.
Biznesoviec nie havoryć navat, što biez Rasiei biełarusy buduć žyć bahaciej. Jon kaža pra toje, što za niezaležnaść mahčyma daviadziecca doraha zapłacić, i hetuju canu varta zapłacić.
I pry hetym — ani kaliva niepryjazi da Rasiei, adčuvańnia jaje čužaści. Naadvarot, hłybokaja suviaź z Rasiejaj, pačynajučy ź pieršaha, absalutna šalonaha dośviedu biznesu z pryježdžym piciercam.
Nie čužy, ale da miažy
Nia vyklučana, što na rašučaść Dzialendzika vykazać svaje pohlady paŭpłyvali siamiejnyja abstaviny biznesoŭca. Dośvied ziacia-katalonca — asabistaja datyčnaść da apantanaj baraćby za svaju niezaležnaść inšaha narodu. Ale naŭrad ci heta vyrašalny momant. Padšturchnuć da ščyravańniaŭ — mahło, ale adpaviednyja pohlady nie ŭźnikajuć ad zamiežnaha dośviedu, chaj sabie i ŭspryniataha praź siamju.
Nu i pry hetym — całkam łukašyst. Zaležnaść ajčynnaha bujnoha biznesu ad ułady — reč ahulnaviadomaja. Ale chvałaśpievy Dzialendzika na adras vyšejšaha načalstva — nieabaviazkova sproba dahadzić i ŭleścić. Takoje bačańnie śvietu: Łukašenka — haspadar, biez haspadara nielha, ni ŭ biznesie, ni ŭ krainie, kali b nia jon, nieviadoma jašče, što było b ź niezaležnaściu.
A spytaŭ by jaho žurnalist «Našaj Nivy» — dyk Łukašenka ž i pastaviŭ pad pahrozu niezaležnaść, miarkuju, što biznesoviec znajšoŭ by, što adkazać. Dobra pašytuju teoryju nie abviarhajuć nijakija fakty, jana ich adaptuje i pierainterpretoŭvaje.
Lustra evalucyi
Pohlady Ŭładzimiera Dzialendzika nasamreč vielmi typovyja. Jon, pierafrazujučy klasyka, peŭnaje lusterka biełaruskaj evalucyi.
Za 28 hadoŭ biełaruskaj niezaležnaści jana zachavałasia, a Łukašenka z restaŭratara SSSR pieratvaryŭsia ŭ niezaležnika nie adno dziakujučy samaachviarnym zmaharam za niezaležnaść. Ale chiba nia ŭ pieršuju čarhu dziakujučy takim voś Dzialendzikam.
Znakamity francuski filozaf Ernst Renan u XIX stahodździ pisaŭ, što nacyja — heta štodzionny referendum, rašeńnie hramadztva žyć razam i asobna ad inšych.
Voś na hetym «štodzionnym referendumie» takija, jak Uładzimier Dzialendzik, i «hałasavali» za niezaležnaść hetyja 28 hadoŭ.
Nu i z uładaj u niečym padobna. Ciapier biznesoviec Dzialendzik — nie viaskovaja babula z pačatkovaj adukacyjaj. Paśpiachovy čałaviek, jaki svajoj pracaj dasiahnuŭ kali nie ŭsiaho, to mnohaha ŭ žyćci. A Zachadu zusim nie čužy, ciapier užo i pa siamiejnych abstavinach. I taksama — kali b Łukašenku padtrymlivali adno viaskovyja babuli i mechanizatary, a nie ŭ tym liku i takija, jak Dzialendzik, dyk i nie kiravaŭ by prezydent krainaj 25 hadoŭ.
Być nastolki typovym — heta ŭnikalnaść.
