Ułady admovilisia raźmiaščać u Viciebsku šyldy z histaryčnymi nazvami vulic
Viciebskija aktyvisty hramadskaha abjadnańnia «Alternatyva» sabrali kala 1000 podpisaŭ pad zvarotam u Viciebski harvykankam z prapanovaj raźmiaścić u centry horadu šyldački z histaryčnymi nazvami vulic. Niadaŭna atrymali adkaz. Ułady pišuć, što naniasieńnie histaryčnych nazvaŭ «moža prynieści peŭnyja niazručnaści dla žycharoŭ i haściej horada…», piša «Viciebskaja viasna».
Prapanova ŭstalavać šyldy ź pieralikam histaryčnych nazvaŭ tyčyłasia 14-ci centralnych vulic Viciebska — Lenina, Suvorava, Tałstoha, Kamsamolskaj, Revalucyjnaj, Kastryčnickaj, Puškina, Putna, kamisara Kryłova, Enhielsa, Uryckaha, Savieckaj, Kirava, Šubina, praśpiekta Frunze, a taksama płoščy Lenina.
Inicyjatary prapanovy abapiralisia na dośvied inšych biełaruskich haradoŭ, naprykład Minsku, Horadni, Baranavič, Pružan dy inšych. Na dumku aktyvistaŭ, ustalavańnie šyldaŭ sa spradviečnymi nazvami vulic dapamoža zachavać Viciebsku svajo histaryčnaje abličča, padkreślić svajo minułaje dy pryvabić turystaŭ.
Nie atrymałasia.
«Horadu Viciebsku ŭ hetym hodzie spaŭniajecca 1045 hadoŭ, padčas jakich haradskija vulicy nieadnarazova źmianiali svaje nazvy. Naniasieńnie ŭsich histaryčnych nazvaŭ vulic na anšłahi nie budzie sadziejničać padtrymańniu adzinaj kancepcyi afarmleńnia histaryčnaj častki horadu, zmoža prynieści peŭnyja niazručnaści dla žycharoŭ i haściej horada», — piša ŭ adkazie aktyvistam «Alternatyvy» namieśnik staršyni Viciebskaha harvykankamu Viktar Hłušyn.
Jakija niazručnaści heta moža prynieści viciablanam i haściam horadu, čynoŭnik nie ŭdakładniaje.
Zatoje spasyłajecca na toje, što vyrab i ŭstanoŭka anšłahaŭ paciahnie za saboj značnyja finansavyja vydatki.
