SK: Pryčynaj śmierci na viasielli ŭ Kobrynskim rajonie mahli stać prablemy z sercam
Śledčy kamitet u svaim telehram-kanale prakamientavaŭ śmierć u Haradcy Kobrynskaha rajona 61-hadovaha mužčyny — žychara Drahičynskaha rajona.
Śledča-apieratyŭnaj hrupaj na miescy zdareńnia było ŭstanoŭlena, što mužčyna, budučy hościem na viasielli dački svajho siabra, padčas mierapryjemstva vyjšaŭ na vulicu razam z baćkam niaviesty.
U hety čas da ich padyšła kampanija maładych ludziej, jakaja źviarnułasia z prośbaj pradać ałkahol. Paśla atrymańnia hrošaj i pieradačy ałkaholu pamiž baćkam niaviesty i kampanijaj moładzi zaviazaŭsia kanflikt, jaki pieraros u bojku, u vyniku čaho mužčynam byli naniesieny cialesnyja paškodžańni. Paśla hetaha kampanija maładych ludziej pajšła ŭ nieviadomym kirunku, a mužčyny viarnulisia ŭ kafe, dzie adnamu ź ich stała drenna.
Hości viasiella vyklikali bryhadu chutkaj miedycynskaj dapamohi i stali pravodzić reanimacyjnyja mierapryjemstvy, jakija stanoŭčaha vyniku nie dali i 61-hadovy mužčyna pamior. Baćka niaviesty špitalizavany.
Sudova-miedycynskim ekśpiertam papiarednie ŭstanoŭlena, što pryčynaj śmierci mužčyny stała sardečna-sasudzistaje zachvorvańnie, adznačajecca ŭ paviedamleńni SK
Na viasielli ŭ Kobrynskim rajonie zabili mužčynu, baćka niaviesty ŭ reanimacyi
