Fest u Budsłavie prajšoŭ z udziełam usich katalickich biskupaŭ Biełarusi FOTY
U Budsłavie zaviaršyŭsia fest Maci Božaj Budsłaŭskaj, uniesieny JUNIESKA ŭ śpis niemateryjalnaj kulturnaj spadčyny čałaviectva, piša catholic.by.
Hałoŭnuju liturhičnuju celebracyju ŭ druhi dzień uračystaściaŭ, 6 lipienia, uznačaliŭ Mitrapalit Minska-Mahiloŭski arcybiskup Tadevuš Kandrusievič, Staršynia Kanfierencyi Katalickich Biskupaŭ u Biełarusi, jaki sioleta adznačaje 30-hodździe biskupskaha słužeńnia.
Na pačatku jubilara pryvitaŭ Hienieralny vikaryj Minska-Mahiloŭskaj archidyjacezii biskup Juryj Kasabucki, jaki zaklikaŭ usich udzielnikaŭ achinuć svajoj malitvaj arcybiskupa.
Arcybiskup Kandrusievič zasiarodziŭ uvahu na abaronie siamji pierad abliččam kryzisu, jak Boham ustanoŭlenaha sajuzu mužčyny i žančyny, adkrytaha dla pryniaćcia i vychavańnia patomstva.
«Pałova siemjaŭ u Biełarusi raźviedziena, što niehatyŭna ŭpłyvaje na hramadski klimat našaj krainy i vychavańnie maładoha pakaleńnia, jakoje zastajecca biez naležnaj i poŭnaj baćkoŭskaj apieki.
Zdarajecca, što siamja zamiest taho, kab być krynicaj radaści i nadziei dla sužonkaŭ i dziaciej, stanovicca «piekłam»», — adznačyŭ kiraŭnik biełaruskaha jepiskapatu.
Tadevuš Kandrusievič z horyčču kanstatavaŭ, što z hoda na hod u našaj krainie paharšajecca demahrafičnaja situacyja.
Jon źviarnuŭ uvahu na jašče adnu źjavu, što ŭ apošni čas pačynaje nabirać abaroty ŭ biełaruskim hramadstvie.
«Boh stvaryŭ čałavieka mužčynam i žančynaj (par. Byc 1, 27), i hetym usio skazana. Možna źmianić źniešni voblik čałavieka, ale nie jaho stvoranuju Boham fizijałohiju»,— na padstavie aŭtarytetu Śviatoha Pisańnia śćvierdziŭ ijerarch.
«Skryty virus» niedalokaha savieckaha minułaha aktyvizujecca «virusam» libieralizmu i maralnaha relatyvizmu, što viadzie da zaniapadu tradycyjnych dla našaha hramadstva chryścijanskich kaštoŭnaściaŭ.
«Čałaviectva bieź siamji nie maje budučyni i nadziei, — zaznačyŭ arcybiskup Kandrusievič. — Baranić siamju i maralny paradak hramadstva — heta abaviazak usich ludziej, relihijnych arhanizacyj i dziaržavy».
«Niahledziačy na prablemy biełaruskaj siamji, varta adznačyć, što ŭ našaj krainie jość šmat prykładaŭ siemjaŭ, jakija budujuć svaju budučyniu na chryścijanskich kaštoŭnaściach. <…>
Sužonki ŭ takich siemjach viedajuć, čamu i kamu pryśviacili svajo žyćcio: kab słužyć i być viernymi adno adnamu, pieradavać Božy dar žyćcia i baranić jaho, vychoŭvać patomstva na chryścijanskich tradycyjach. Honar i chvała im!» — uskliknuŭ arcypastyr.
Bieručy pad uvahu ŭsiu surjoznaść situacyi, u jakoj znachodzicca sučasnaja biełaruskaja siamja, kiraŭnik biełaruskaha katalickaha jepiskapatu zaklikaŭ viernikaŭ svaim štodzionnym žyćciom paćviardžać vieru ŭ Jevanhielle i vučeńnie Kaścioła.
Arcybiskup Kandrusievič zaviaršyŭ svaju hamiliju karotkaj malitvaj:
«Siońnia źviartajemsia da Ciabie, Apiakunka Biełarusi i Karaleva siemjaŭ, Božaja Maci Budsłaŭskaja. Vyprasi ŭ svajho Syna Jezusa Chrysta novy cud adradžeńnia biełaruskaj siamji jak krynicy radaści i nadziei dla našaj Baćkaŭščyny, i asabliva dla moładzi».
Na zakančeńnie ŭračystaści da viernikaŭ źviarnuŭsia pradstaŭnik papy Franciška ŭ Biełarusi Apostalski nuncyj Habar Pinter.
«Z radaściu i ŭdziačnaściu Bohu ja znachodžusia siońnia tut razam z vami, lubyja braty i siostry, u hetym darahim maryjnym sanktuaryi ŭ Budsłavie, bahatym historyjaj i vieraj, kudy my jak syny i dočki prychodzim sustrecca z našaj Maci i z našymi bratami.
Sanktuaryi — śviatyja miescy Kaścioła jak palavoha špitala — zachoŭvajuć pamiać viernaha naroda, jaki i ŭ niahodach nie stamlajecca šukać krynicaŭ žyvoj vady, u jakich možna adnavić nadzieju. Heta miescy śviataŭ i ŭračystaściaŭ, ślozaŭ i maleńniaŭ, kali my prychodzim da noh Maci biez šmatlikich słovaŭ, a tolki dazvalajučy Joj hladzieć na nas, kab Jana svaim pozirkam pryviała nas da Taho, chto jość «Darohaj, Praŭdaj i Žyćciom» (Jan 14, 6)», — skazaŭ arcybiskup Habar Pinter.
U Budsłavie znoŭ prysutničali ŭsie katalickija biskupy Biełarusi, pradstaŭnik Biełaruskaj Pravasłaŭnaj Carkvy, dypłamaty, vialikaja kolkaść duchavienstva.
U pracesii z pašanaju nieśli kopiju cudatvornaha abraza Maci Božaj Budsłaŭskaj, a taksama fihuru niabiesnaha zastupnika Kaścioła na Biełarusi śviatoha Michała Archanioła.