Va Ukrainie zatrymali «rasijskaha špijona»: jon sustrakaŭsia sa svaimi kuratarami ŭ Biełarusi
U raśśledavańniach ukrainskich specsłužbaŭ Biełaruś druhi raz fihuruje jak miesca sustrečy zaverbavanych Rasiejaj ukraincaŭ sa svaimi kuratarami, piša «Radyjo Svaboda».
Supracoŭniki kontravyviedki razam z Hałoŭnym śledčym upraŭleńniem Słužby biaśpieki Ŭkrainy zatrymali zaverbavanaha rasiejskaj vajskovaj vyviedkaj ukrainca, jaki pieradavaŭ sakretnuju infarmacyju svaim kurataram na sustrečach u Biełarusi.
Jak paviedamili Svabodzie ŭ presavaj słužbie SBU, supracoŭnik adnaho z pradpryjemstvaŭ kancernu «Ukroboronprom» byŭ zaverbavany na terytoryi Krymu ŭ 2014 hodzie i pieradavaŭ rasiejskamu boku infarmacyju ab funkcyjanavańni pradpryjemstvaŭ abaronnaj pramysłovaści Ŭkrainy.
Žychar Zaparoskaj vobłaści byŭ zatrymany pry pierasiačeńni dziaržaŭnaj miažy, kali nakiroŭvaŭsia ŭ Varoniež na čarhovuju sustreču sa svaim kurataram. Pavodle SBU, usiu infarmacyju jon pieradavaŭ aficeram Centralnaha kamandavańnia Uzbrojenych siłaŭ Rasiei pa kanałach elektronnaj suviazi, a taksama ŭ časie asabistych sustreč, jakija arhanizoŭvalisia nia tolki ŭ Rasiei i Krymie, ale i ŭ Biełarusi.
Pavodle infarmacyi SBU, u časie kožnaj sustrečy jon atrymlivaŭ ad 400 da adnoj tysiačy dalaraŭ za sabranyja źviestki pra abaronnuju pramysłovaść Ukrainy. U časie pieratrusu pa miescy žycharstva zatrymanaha kanfiskavali kamputary dy inšyja nośbity infarmacyi, jakija vykarystoŭvalisia dla apracoŭki, zachoŭvańnia i pieradačy sabranych źviestak, a taksama srodki suviazi z kuratarami.
Ciapier vyjaŭlenaha «rasiejskaha ahienta» aryštavali, jon abvinavačvajecca ŭ dziaržaŭnaj zdradzie.
Heta druhi vypadak, kali ŭ materyjałach dasudovaha raśśledavańnia Biełaruś fihuruje jak miesca sustrečy zaverbavanych Rasiejaj ukraincaŭ sa svaimi kuratarami. Sioleta ŭ sakaviku ŭ Charkavie byŭ zatrymany čynoŭnik Charkaŭskaj haradzkoj rady, jaki taksama pieradavaŭ rasiejskamu boku vyviedanyja dadzienyja ŭ časie sustreč u Biełarusi.
