Dziesiać štrafaŭ na dvaich. U Lidzie muž i žonka pa čarzie trapili ŭ DTZ
U subotu dniom u mikrarajonie Maładziožny ŭ Lidzie adbyłosia DTZ z udziełam niećviarozaha kiroŭcy. 44-hadovy žychar nie spraviŭsia z kiravańniem aŭtamabila «Rovier 416», źjechaŭ z prajeznaj častki i ŭdaryŭsia ŭ bietonnuju aharodžu adnaho z pryvatnych damoŭ, piša «Lidskaja hazieta».
Na ščaście, ni jon, ni jaho žonka, jakaja jechała ŭ aŭtamabili ŭ jakaści pasažyra, ni chto-niebudź z vypadkovych minakoŭ nie paciarpieli. Kiroŭcu advieźli na miedycynski ahlad. U jaho arhaniźmie było 2,38 pramile ałkaholu.
Akazałasia, što siamja lidčukoŭ ździejśniła faktyčna dva DTZ. Spačatku na «Roviery» ŭ aharod zajechała žonka, a zatym u płot muž. Supracoŭnikaŭ DAI vyklikali vidavočcy.
Narad na miescy zdareńnia vyjaviŭ tolki pabity aŭtamabil. Paźniej byli zatrymanyja kiroŭca, jaki pakinuŭ miesca DTZ, i jaho žonka.
Vyśvietliłasia, što, vyjšaŭšy ź miascovaha mahazina, žonka paprasiła muža dazvolić joj sieści za rul. Mužčyna dazvoliŭ, niahledziačy na toje, što žonka była pjanaj i nikoli nie mieła vadzicielskaha paśviedčańnia. Jana prajechała trochi — pakul aŭtamabil nie ŭtknuŭsia ŭ bulbianoje pole.
Tady za rul znoŭ sieŭ mužčyna, ale prajechać bolš za sto mietraŭ na paškodžanym aŭtamabili jon nie zmoh i, straciŭšy kiravańnie, zajechaŭ u płot. Pakinuŭšy mašynu na miescy zdareńnia, muž i žonka syšli dadomu, dzie paźniej ich zatrymali supracoŭniki DAI.
U vyniku na ich było składziena dziesiać pratakołaŭ: šeść na muža i čatyry na žonku.
