Vynieśli prysud adeptu SSSR, jaki «aryštoŭvaŭ» prakurorku
35-hadovy Ivan Cyrulnikaŭ z sakavika byŭ pad vartaj. Jon razam z paplečnikami pa fryk-supołcy prychilnikaŭ SSSR pryjšoŭ u prakuraturu i pasprabavaŭ tam pravieści «hramadzianski aryšt» prakurorki. Ale ŭ vyniku zatrymali samoha Cyrulnikava.
Paśla byŭ sud. Vyrašali los Ivana ŭ sudzie Centralnaha rajona Minska.
Na minułym tydni ahučyli vyrak Cyrulnikavu. Jon pajedzie ŭ kałoniju.
«Jon raskajaŭsia na sudzie, pryznaŭ vinu. U vyniku atrymaŭ 2 hady pazbaŭleńnia voli. Jašče jość čas na apielacyju, prysud nie ŭstupiŭ u siłu», — raspaviała «Našaj Nivie» žonka Cyrulnikava.
Nahadajem, što Ivan Cyrulnikaŭ pryjšoŭ u prakuraturu paskardzicca, što jamu nie chočuć pamianiać hramadzianstva ŭ pašparcie. Cyrulnikaŭ prasiŭ, kab u biełaruskim pašparcie jamu pastavili hramadzianstva Savieckaha Sajuzu, bo jon člen «Abščyny Biełaj Rusi» (takaja supołka ludziej ź dziŭnavatymi pohladami).
Čytajcie. Adepty SSSR teraryzujuć čynoŭnikaŭ: daviali deputata da isteryki, na ŭpaŭnavažanaha pa spravach relihij vyklikali AMAP. Chto jany? VIDEA
«Ivan chacieŭ trapić na pryjom da prakurora horada, padać zajavu, bo jamu ŭ pašpartnym stale admovili vypravić dadzienyja ŭ pašparcie. Jon chacieŭ źmianić biełaruskaje hramadzianstva na hramadzianstva Savieckaha Sajuza. RB ž kazała, što jana pravapierajemnik SSSR. Tamu MUS abaviazany vydavać dakumienty ŭ adpaviednaści z paśviedčańniem ab naradžeńni. A tam staić Saviecki Sajuz», — tłumačyŭ paplečnik Ivana Siarhiej Sozinaŭ
Padziei, pa słovach Sozinava, razhortvalisia nastupnym čynam. U faje vyjšła žančyna, jakaja nazvałasia prakurorkaj. Jaje nibyta paprasili pakazać dakumienty, jana admoviłasia. Tady, kaža Sozinaŭ, Ivan Cyrulnikaŭ abvieściŭ, što «praviadzie hramadzianski aryšt» žančyny. Praściej kažučy, zatrymaje jaje, bo, moža, jana i nie prakurorka zusim.
U vyniku dla «hramadzianina Savieckaha Sajuzu» Cyrulnikava ŭsio skončyłasia kryminalnaj spravaj i realnym terminam.
