Twitter budzie chavać zapisy palitykaŭ, kali jany parušajuć praviły sacsietki
Twitter uvioŭ śpiecyjalnuju «zahłušku» dla zapisaŭ aficyjnych asob, źmiest jakich parušaje toje ci inšy punkt praviłaŭ sacyjalnaj sietki.
Ale vydaleny paviedamleńni nie buduć: u sacsietcy ličać, što hramadstva pavinna mieć mahčymaść aznajomicca z vykazvańniami palitykaŭ i čynoŭnikaŭ
U kampanii adznačyli, što i raniej nie vydalali niekatoryja zapisy z parušeńniami, kali ličyli, što ich dastupnaść słužyć intaresam hramadstva. Adnak inšym karystalnikam nie zaŭsiody było jasna, čamu administracyja pakidała tyja ci inšyja paviedamleńni, havorycca ŭ tłumačeńni sacyjalnaj sietki.
«Z-za svaich pasadaŭ lidary vałodajuć mahutnym upłyvam i časam kažuć rečy, jakija možna ličyć supiarečlivymi abo jakija vyklikajuć sprečki. Adna z klučavych funkcyj našaha servisu — pradastaŭleńnie placoŭki, dzie ludzi mohuć adkryta, publična adkazać svaim lideram i zaklikać ich da adkaznaści za svaje słovy», — paviedamiła sacsietka.
Ciapier zapisy, jakija mohuć parušać praviły Twitter, ale jakija zrobleny ŭpłyvovymi asobami, buduć schavanyja z pošuku i buduć radziej źjaŭlacca ŭ rekamiendacyjach. Zamiest aryhinalnaha paviedamleńni karystalniki buduć bačyć apaviaščeńnie ab tym, jakija praviły byli parušanyja ŭ zapisie, i, kali zachočuć, zmohuć ubačyć zychodny tvit.
Kab zapisy nie vydalalisia, a chavalisia, akaŭnt pavinien adpaviadać trom kryteram:
- jon pavinien naležać dziaržaŭnamu słužačamu abo jaho pradstaŭniku;
- na jaho pavinny być padpisany bolš za 100 tys. inšych karystalnikaŭ;
- jon pavinien być vieryfikavany.
Vyznačać, ci važny tvit, jaki parušyŭ praviły, dla hramadskaści, budzie śpiecyjalnaja kamanda. Jana budzie aryjentavacca na niekalki kryteraŭ, naprykład, nakolki surjoznuju škodu moža nanieści taja ci inšaja zapis.
Novyja praviły nie zakranuć zapisy, zroblenyja da 27 červienia.
