Až šeść deputataŭ prahałasavali suprać papravak ab adterminoŭcy ad pryzyvu
Redki vypadak u historyi biełaruskaha parłamienta. Kali deputaty Pałaty pradstaŭnikoŭ hałasavali ŭ pieršym čytańni za papraŭki ŭ zakonaprajekt «Ab źmianieńni zakonaŭ pa pytańniach efiektyŭnaha funkcyjanavańnia vajennaj arhanizacyi dziaržavy», «za» było tolki 87 čałaviek, šeść prahałasavali «suprać», a šeść ustrymalisia.
Papraŭki ŭ parłamiencie pradstaŭlaŭ ministr abarony Andrej Raŭkoŭ.
«Peŭnaj navacyjaj źjaŭlajecca zamacavańnie abmiežavańnia na pryjom na dziaržaŭnuju słužbu, słužbu ŭ siłavy błok krainy hramadzian, jakija nie prajšli vajennuju słužbu pa pryzyvie, nie majučy na heta zakonnych padstaŭ», — cytuje Raŭkova interfax.by.
Ministr adznačyŭ, što hetaje abmiežavańnie maje kankretnuju metavuju hrupu ŭździejańnia — «niesumlennyja hramadzianie respubliki, jakija śviadoma i naŭmysna paźbiahajuć vykanańnia kanstytucyjnaha abaviazku pa abaronie Ajčyny».
«U suchim astatku zastajucca pryzyŭniki, jakija chavajucca za miažoj ci ŭ respublicy, prymajuć usie miery, kab nie atrymać paviestki vajennych kamisaryjataŭ. Jany prychodziać u vajenkamat tolki kali im spaŭniajecca 27 hadoŭ, atrymlivajuć vajenny bilet i iduć pracavać kudy im chočacca. Pryblizna heta 4 tys. čałaviek na kožny pryzyŭ. My ličym, što takija dziejańni hramadzian niesumiaščalnyja z zajmańniem dziaržaŭnych pasadaŭ. Jak jany mohuć pracavać u intaresach dziaržavy, kali naŭmysna nie vykanali voinski abaviazak u intaresach hetaj ža dziaržavy», — dadaŭ kiraŭnik Minabarony.
U vyniku deputaty prahałasavali za zakonaprajekt u pieršym čytańni.
Nahadajem, što asnoŭnyja novaŭviadzieńni zakonaprajekta nastupnyja:
1. Adterminoŭka dla atrymańnia adukacyi budzie davacca tolki raz. Paśla škoły małady čałaviek, naprykład, moža pastupać u VNU, siaredniuju śpiecyjalnuju ŭstanovu. Ale, kali jon advučyŭsia ŭ kaledžy, jamu pryjdziecca spačatku adsłužyć, a potym iści ŭ VNU. Kali paśla škoły chłopiec advučyŭsia ŭ VNU, to adsłužyć daviadziecca pierad mahistraturaj.
2. Pryzyŭnaja kamisija moža pryniać rašeńnie ab pryznańni čałavieka «hramadzianinam, jaki nie prajšoŭ vajennuju słužbu pa pryzyvie, nie majučy na toje zakonnych padstaŭ». Takimi buduć pryznanyja chłopcy, jakija da 27 hadoŭ ŭchilalisia ad pryzyvu. Źviestki ab tym, što jany nie prajšli vajennuju słužbu, buduć zanosicca ŭ vajenny bilet u hrafu «Asablivyja adznaki». Z takoj adznakaj nie voźmuć u MUS, MNS, Dziaržaŭny kamitet sudovych ekśpiertyz, u orhany finansavych rasśledavańniaŭ KDK, SK, a taksama na dziaržsłužbu.
3. Tym, chto «naležna apavieščany i nie źjaviŭsia na mierapryjemstvy pa pryzyvie», zabaroniać vyjezd za miažu. Maładoha čałavieka pavinny pryznać uchilistam (a heta peŭnaja pracedura z zaviadzieńniem kryminalnaj spravy i inš.) I tolki potym vyjezd mohuć zabaranić.
4. Razam z tym tych, chto paśla vučoby pojdzie ŭ vojska pa kantrakcie, vyzvalać ad raźmierkavańnia. Pry hetym hrošy za adukacyju jany viartać nie buduć.
