Śnifinh — źjaviłasia novaja niebiaśpieka dla biełaruskich dziaciej
U svaim fejsbuku aficyjnaja pradstaŭnica SK Julija Hančarova adznačyła, što padčas śledčaj praktyki pieryjadyčna sustrakajeccca adnosna novaja źjava pad nazvaj «śnifinh». Tłumačym, što heta takoje.
Pad pryhožym anhlijskim słovam chavajecca banalnaja padletkavaja taksikamanija. Kali raniej padletki niuchali klej, to ciapier jaho zamianili inšyja, ale takija ž dastupnyja rečyvy. Śnifinham nazyvajuć udychańnie aerazolej ci hazu ad zapalnic.
U Biełarusi hetaje «chobi» raspaŭsiudžanaje pakul nie nadta šyroka. U Rasii ž sa śnifinham zmahajucca daŭno.
Mienavita śnifinham ci to zajmalisia, ci to źbiralisia zaniacca padletki ŭ Navapołacku. Skončyłasia ŭsio biadoj, adzin ź ich vypaŭ z akna i zahinuŭ.
Efiekt ad udychańnia hazu adnosna karotki. Haz vyciaśniaje z mozhu kisłarod, čym vyklikaje karotki pieryjad ejfaryi. Voś tolki škoda zdaroŭju nanosicca surjoznaja. Pryčym śnifinham mohuć zajmacca i dzieci, jakija nie pjuć i nie kurać, bo vyhladaje heta jak bolš biaśpiečnaja zabaŭka. Dyj kupić haz dla zapalnic značna praściej, čym cyharety ci ałkahol.
Niaredka vynikam śnifinhu stanovicca śmierć. U Rasii viadoma pra ceły šerah trahičnych historyj.
Vyratavać paciarpiełych ad śnifinhu ciažej. Pach hazu chutka źnikaje, i daktary nie mohuć dyjahnastavać, što dzicia, jakoje lažyć biez prytomnaści, mienavita nadychałasia hazam.
Tamu baćki i daktary rajać źviartać uvahu na stan i pavodziny svaich dziaciej.
Asabliva źviarnicie ŭvahu, kali ŭ dziciaci pieryjadyčna zaŭvažnyja nastupnyja prykmiety:
- vierchniaja častka cieła i hałava haračyja (ad prylivu kryvi), tvar aciakaje;
- razdražnieńnie ślizistych vierchnich dychalnych šlachoŭ (nos — čyrvony);
- vakoł vusnaŭ, asabliva ŭ kutkach rota, adznačajecca ablamoŭka razdražnieńnia skury;
- achrypłaść hołasu;
- słabaść, młosnaść i vanity;
- hrubaje rasstrojstva pavodzin: ahresija, padman.
