Anžalika Ahurbaš pra svoj razvod: Ja zrazumieła, što jon mianie albo zrobić invalidam, albo zabje
Śpiavačka Anžalika Ahurbaš u prajekcie «Los čałavieka» na telekanale «Rasija 1» pryznałasia, što raźviałasia ź viadomym «kaŭbasnym karalom» Mikałajem Ahurbašam, «kab nie być rabyniaj», pišuć Vesti.ru.
Spačatku ich adnosiny nahadvali kazku: adrazu paśla znajomstva Mikałaj skazaŭ, što ciapier usie jaje prablemy skončylisia. Anžalika atrymlivała ad jaho maksimum kachańnia, uvahi, kłopatu.
Mikałaj arhanizavaŭ z kamfortam jaje pobyt, a zatym raźvioŭsia z žonkaj, jakaja naradziła jamu čaćviarych dziaciej. Para ažaniłasia, nieŭzabavie ŭ ich naradziŭsia syn Anastas.
Mienavita ź Mikałajem źviazany ŭźlot Anžaliki jak śpiavački. Ahurbaš staŭ nie tolki jaje mužam, ale i pradziusaram.
Za 10 hadoŭ šlubu jana ŭziała ŭdzieł u «Jeŭrabačańni» i vypuściła niekalki albomaŭ.
Adnak ź ciaham času ramantyčnaja historyja pieratvaryłasia ŭ dramu.
Anžalika raspaviadaje, što nie paznavała Mikałaja, jaki ŭjaviŭ siabie jaje «boham», kazaŭ, što «stvaryŭ» jaje, tamu śpiavačka nie maje prava hołasu.
Artystka raspaviadaje, što dachodziła da rukaprykładstva, tamu adnojčy jana nie vytrymała, źniała piarścionak i syšła ŭ svabodnaje žyćcio. Ničoha svajho ŭ jaje na toj momant praktyčna nie było — usio naležała Mikałaju.
«Ja zrazumieła, što jon mianie albo invalidam zrobić, albo zabje. Zaryje na svaich troch hiektarach ziamli, pryjdzie na prahramu i skaža: «Źbiehła z paluboŭnikam, a ja jaje tak kachaŭ», — pryznajecca śpiavačka.
Raźviałasia para ŭ 2012 hodzie, i heta byŭ adzin z samych hučnych i dramatyčnych razvodaŭ u šou-biznesie.
Anžalika raspaviadała ŭ ŚMI, nakolki despatyčna pavodziŭ siabie Mikałaj, a jon paprakaŭ byłuju žonku ŭ zdradzie, ultymatumie z nahody razvodu ź pieršaj žonkaj i ŭ tym, što jana nastroiła suprać jaho starejšaha syna.
