Hamialčuk paskardziŭsia ŭ DAI, što Łukašenka parušyŭ praviły darožnaha ruchu — i atrymaŭ aryhinalny adkaz
Hamialčuk Pavieł, jaki źviarnuŭsia ŭ DAI Homiela z prośbaj dać pravavuju acenku dziejańniam Alaksandra Łukašenki Biełarusi i jaho paplečnikaŭ padčas pajezdki na Viciebščynu ŭ pačatku červienia, atrymaŭ adkaz, piša abw.by.
Nahadajem: u pieršyja dni miesiaca Alaksandr Łukašenka razam z małodšym synam i hrupaj tavaryšaŭ prakaciŭsia na rovary pa Aršanskim rajonie. Heta była niefarmalnaja pajezdka. U sieciva trapili kadry, na jakich bačna, jak u pasiołku Bałbasava Aršanskaha rajona kiraŭnik dziaržavy, viedučy rovar u rukach, syšoŭ z tratuara na prajeznuju častku. Jaho prykładu rušyli ŭśled i asoby, jakija jaho supravadžali. U hetych dziejańniach Pavieł uhledzieŭ parušeńnie Praviłaŭ darožnaha ruchu i źviarnuŭsia pa tielefonie ŭ DAI Homiela.
Jaho «sihnał» pryniali, i 20 červienia mužčyna atrymaŭ pa pošcie aficyjny adkaz: «Pryniata rašeńnie ŭ adpaviednaści z zakanadaŭstvam».
— Kolki ni maju znosiny z orhanami, ale takoha jašče nie atrymlivaŭ, — kamientuje atrymany adkaz Pavieł. — Byli ŭ majoj praktycy vypadki, kali ja źviartaŭsia ŭ DAI, kab taja razabrałasia z asabliva nachabnymi parušalnikami parkoŭki. Mnie prychodzili narmalnyja matyvavanyja adkazy, praŭda, nie ŭkazvalisia dadzienyja parušalnika, zatoje zaŭsiody była infarmacyja, pa jakim artykule jon byŭ pryciahnuty da adkaznaści. A tut — poŭny zmrok. U styli: «Vy praviali pravierku?» — «Praviali!» — «I jaki vynik?» — «Narmalna ŭsio. Pracujem».
Pry hetym, ličyć Pavieł, poŭnym absurdam vyhladaje apošni abzac adkazu, u jakim prapanujecca ŭ vypadku niazhody abskardzić rašeńnie ŭ vyšejstajačym orhanie.
— Što i jak ja mahu abskardzić, kali mnie nieviadomy vynik razboru? — ździŭlajecca mužčyna. — A naohuł nie vyklučaju, što ŭ hetaj situacyi mieła miesca biaździejnaść słužbovaj asoby (abo asobaŭ) pry praviadzieńni pravierki.