U minskim aeraporcie 10 000 zamiežnikaŭ pačastujuć vałoškavym marožanym
Hetym letam u Biełarusi zamiežnych haściej buduć sustrakać vałoškavym marozivam. U Nacyjanalnym aeraporcie Minsk padčas prylotu mižnarodnych rejsaŭ turysty zmohuć pačastavacca samym biełaruskim płambiram. Usiaho dla haściej padrychtavana bolš za 10 000 porcyj desiertu. Pačastavacca niezvyčajnym marozivam paśla sychodžańnia z trapa samalota zamiežniki zmohuć z 20 pa 22 červienia.
Turysty, jakija pryjazdžajuć u Hruziju, dziviacca haścinnaj sustrečy, niekatoryja raspaviadajuć, što im padaryli butelku vina prosta na miažy. Hetym letam Biełaruś taksama zapomnicca haściam jak kraina, jakuju litaralna možna pakaštavać na smak: zamiežnikaŭ u aeraporcie Minsk-2 buduć častavać novym marozivam ź pialostkami vałoški i nasieńniem lonu. Nacyjanalny desiert z «kvietak Radzimy» vyrabiła samaja staraja ŭ Biełarusi fabryka marožanaha «Bieły polus». Jana ž, sumiesna ź Ministerstvam sportu i turyzmu Biełarusi, arhanizavała haścinnuju akcyju ŭ aeraporcie.
«Kali ŭ Biełaruś pryjazdžajuć turysty, im pierš za ŭsio rajać pakaštavać draniki. My lubim kłasiku, ale taksama chočam raznastaić mieniu zamiežnikaŭ. Vasilkova maroziva — svajho rodu «nacyjanalny desiert», jaki možna znajści tolki ŭ Biełarusi. Hetuju akcyju my arhanizavali, kab hości našaj krainy pačynali znajomstva z horadam z čahości pryjemnaha i kałarytnaha. Dumajem, što płambir z vasilkoŭ vydatna spravicca sa svajoj misijaj i paznajomić haściej z sapraŭdnaj vietłaj i dušeŭnaj Biełaruśsiu», — kamientuje namieśnik dyrektara pa markietynhu «Biełaha polusa» Maksim Žurovič.
Maksim Žurovič, namieśnik dyrektara pa markietynhu «Biełaha polusa».
Na praciahu troch dzion turystaŭ buduć sustrakać vałoškavym marozivam. Paśla prylotu mižnarodnych rejsaŭ u aeraporcie Minsk-2 budzie źjaŭlacca «kapitan» u harnitury vałoškavaha koleru — mienavita jon budzie častavać inšaziemcaŭ. Usiaho dla turystaŭ padrychtavali kala tony kałarytnaha biełaruskaha desiertu.
«U 2018-m kolkaść zamiežnikaŭ, jakija naviedali Biełaruś, pavialičyłasia, u paraŭnańni z papiarednim hodam, praktyčna na paŭmiljona: da nas u hości pryjechała 4,7 miljona čałaviek. U hetym hodzie my čakajem jašče bolš turystaŭ: napieradzie Jeŭrapiejskija hulni, svaju spravu taksama robić i tryccacidzionny biaźviz, — raspaviadaje pres-sakratar Ministerstva sportu i turyzmu Biełarusi Uładzimir Nieściarovič. — Nam by vielmi chaciełasia, kab pa pryjeździe ŭ našu krainu kožny hość adrazu ž adčuvaŭ biełaruskuju haścinnaść. Dumajem, što maroziva z vasilkoŭ jakraz stanie pieršym pryjemnym uražańniem dla turystaŭ i zadaść ton ich padarožža ŭ Biełaruś».
Akramia pačastunku ŭ aeraporcie, «Bieły polus» i Ministerstva sportu i turyzmu taksama padrychtavali maroziva dla naviedvalnikaŭ ekskursij pa Minsku. Kožny dzień z 20 pa 30 červienia a 12:00 ad płoščy Jakuba Kołasa ŭ Minsku budzie adpraŭlacca dvuchpaviarchovy aŭtobus Open Minsk ź niezvyčajnaj prahramaj.
Ruskamoŭnych turystaŭ navučać biełaruskim frazam, dapamohuć padpisać i adpravić paštoŭki siabram u roznyja kutki śvietu. «Pryvitańnie z samaha čystaha horada! Draniki vielmi smačnyja. Šlu tabie buśku!» — zamiežniki vybieruć, jakija frazy najlepšym čynam apisvajuć ich uražańni, i pačastujucca płambiram z vasilkoŭ.
Aŭtar fota: Lizavieta Haravaja
