U Niamieččynie mužčyn buduć abaraniać ad chatniaha hvałtu
Ułady Bavaryi i Paŭnočnaha Rejna-Viestfalii apublikavali prahramu abarony mužčyn ad chatniaha hvałtu, piša Deutsche Welle.
«Mužčyny taksama stanoviacca achviarami hvałtu ŭ siemjach, i dla ich da hetaha času nie było praduhledžana nijakaj dapamohi abo padtrymki», — adznačyli ŭ sumiesnaj zajavie ministr pa siamiejnych i sacyjalnych pytańniach Bavaryi Kierścin Šrajier i jaje viestfalskaja kaleha Ina Šarenbach.
Prapanavanaja imi inicyjatyva składajecca ź niekalkich etapaŭ: spačatku źjaviacca haračaja linija i anłajn-kansultacyja, zatym buduć arhanizavany prytułki i centry kansultacyj dla achviaraŭ hvałtu. U vyniku aŭtary prahramy raźličvajuć na hramadskaje abmierkavańnie i «razbureńnie tabu» vakoł hetaha pytańnia.
Palityki spadziajucca, što raspracavanyja imi miery zadaduć trend dla ŭsioj astatniaj Hiermanii.
U 2018 hodzie mužčyny skłali 17,9% achviar chatniaha hvałtu ŭ Niamieččynie. Usiaho pravaachoŭniki naličyli 23872 vypadki, kali pradstaŭniki mužčynskaha połu stali achviarami napadaŭ, zhvałtavańniaŭ, sprob zabojstva abo abmiežavańniaŭ voli z boku svaich partnioraŭ. Realnaja ličba moža być vyšejšaj — mužčyny vielmi redka paviedamlajuć pra padobnyja złačynstvy praz soram ci bojaź taho, što im nie pavierać.