Pieršy chakieist ź Biełarusi ŭ NCHŁ naviedaŭ rodnuju viosku. Praz 76 hadoŭ paśla adjezdu
Džon Mišuk u Nalibakach.
Džonu (Janu) Mišuku, pieršamu ŭradžencu Biełarusi, jaki zhulaŭ u paŭnočnaamerykanskaj Nacyjanalnaj chakiejnaj lizie, 79 hod. U vajnu niemcy spalili jahonuju rodnuju viosku Nalibaki. Dalej byli emihracyja ŭ Kanadu i šlach da NCHŁ. U červieni chakieist-lehienda ŭpieršyniu pryjechaŭ na radzimu, piša Radyjo Svaboda.
Viosku spalili, siamju vyvieźli ŭ Niamieččynu
Ciapier na miescy, dzie stajała chata Džonavych baćkoŭ, — čystaje pole. U 1943 hodzie niemcy viosku spalili, a žycharoŭ vyvieźli na prymusovyja pracy ŭ Niamieččynu. Pra tyja časy Džon mała što pamiataje: jamu było try hady.
«Naša siamja straciła ŭsio, — kaža Džon. — Heta byŭ ich dom. Nas vyhnali z fermy, a viosku spalili daščentu».
Pierajezd u Kanadu, zachapleńnie chakiejem
Paśla vajny siemji ź niamieckich lahieraŭ pierajaždžali ŭ Kanadu. Takaja była historyja i ŭ Džonavaj siamji. Spačatku ŭ 1950 hodzie ŭ Kanadu pierajechaŭ baćka Džona, jaki znajšoŭ tam pracu na hrybnoj fermie. Paśla jon viarnuŭsia pa astatniuju siamju i pieravioz usich u Hemiłtan (Antaryjo). Pa vajnie ŭ Hemiłtan pierajechała i šmat ichnich znajomych z Nalibak.
Džon pryznajecca, što pačaŭ hulać u chakiej davoli pozna pa mierkach Kanady — u 10 hod.
«Jak i luboje inšaje dzicia, ja štodnia koŭzaŭsia na kańkach pa lodzie, — raspaviadaje Džon. Maci zvyčajna hnała mianie z koŭzanki kožny dzień: «Hej, viartajsia dachaty!»».
Džon z dačkoj Mery i ŭnučkaj Hejli.
Chłopiec z Nalibak — u najmacniejšaj chakiejnaj lizie śvietu
U 13 hod Džon pačaŭ hulać za miascovyja junijorskija kluby, a jašče praz 7 hod debiutavaŭ u najmacniejšaj chakiejnaj lizie śvietu — NCHŁ — u składzie amerykanskaj kamandy Detroit Red Wings.
U nastupnyja 7 hod abaronca Mišuk pravioŭ 237 hulniaŭ (7 hałoŭ, 39 pieradač) u składzie čatyroch kamandaŭ Nacyjanalnaj chakiejnaj lihi — aproč Detrojta, heta Chicago Black Hawks, Philadelphia Flyers i Minnesota North Stars. Jon taksama zhulaŭ bolš za 200 matčaŭ u inšaj prafesijnaj chakiejnaj lizie WHA, ź jakoj u 1970-ch biespaśpiachova sprabavali zrabić kankurenta NCHŁ.
U 37 hadoŭ Džon syšoŭ z prafesijanalnaha chakieju. Paśla vystupaŭ u klubie veteranaŭ.
«Ja hulaŭ prosta dziela pryjemnaści da 60 hadoŭ, tamu što vielmi sumavaŭ pa chakiei», — kaža Džon.
Dačka Džona Ketlin pakazvaje archiŭnaje fota svajho baćki.
Biznes na fast-fudzie
U paślaspartovym žyćci ŭradženiec Nalibak pajšoŭ u biznes. Spačatku pracavaŭ u San-Dyjeha ŭ restaranie chutkaha absłuhoŭvańnia Jack In The Box. A ŭ 1980-m viarnuŭsia ŭ Kanadu i adkryŭ pa franšyzie restaran chutkaha absłuhoŭvańnia Tim Horton Donuts — hetaja sietka specyjalizujecca na kavie i pončykach.
U biznesie Džon užo 35 hadoŭ. Pryznajecca, što «spravy iduć vielmi dobra». Ciapier u jaho z synami čatyry restarany.
Džon pakazvaje na miesca, dzie stajała jaho chata.
Viartańnie na radzimu
Viartańnie na radzimu zaniało ŭ Džona 76 hadoŭ. U červieni jon razam z dočkami Ketlin i Mery i ŭnučkaj Hejli pryjechaŭ u Biełaruś na try dni.
«Hetuju pajezdku splanavała maja dačka Ketlin, za što ja joj vielmi ŭdziačny, — kaža Džon. — Dla mianie važna było pabyvać u miescy, dzie ja naradziŭsia. My schadzili na mohiłki i ŭ kaścioł. Ja tut usiaho paru hadzinaŭ, ale mnie vielmi kamfortna. Ja rady, što viarnuŭsia ŭ Nalibaki. Ja sprabuju adčuć dušu miaściny».
U Biełarusi ŭ Džona žyvie trajuradny brat Viačasłaŭ Mišuk. U Nalibakach zastałasia chata jahonaha baćki.
«Tut pačaŭsia naš rod, — kažuć svajaki Džona. — Tut žyŭ i pradzied Džona. Heta ziamla Mišukoŭ».
Džon u dvary chaty, dzie žyŭ jaho pradzied. Tut pačaŭsia rod Mišukoŭ.
