U Polščy źbirajuć podpisy za biełaruskuju movu ŭ pamiežžy
Hramadzianin Polščy Pšemysłaŭ Kučynski źviarnuŭsia da vajavody Padlašša i hubiernatara Lublina z prośbaj ab uviadzieńni biełaruskaj movy na miažy z Respublikaj Biełaruś, piša Radyjo Svaboda.
Inicyjatyva datyčycca ŭsich infarmacyjnych došak, aŭdyjo i vizualnych paviedamleńniaŭ, jakija ciapier pradstaŭleny tolki pa-polsku i časam dublujucca pa-rasijsku.
Spadar Kučynski inicyjavaŭ pietycyju, u jakoj akcentuje ŭvahu na tym, što biełaruskaja mova — dziaržaŭnaja mova ŭschodniaj susiedki Polščy, i padkreślivaje jaje suvierenitet, a na polskaj miažy z Respublikaj Biełaruś niemahčyma znajści infarmacyju na hetaj movie.
«Pierasiačeńnie miažy — heta miesca pieršaha kantaktu hramadzianina inšaj krainy z terytoryjaj Respubliki Polšča i słužbami, jakija pradstaŭlajuć jaje vyšejšyja orhany ŭłady. Štohod miažu pierasiakajuć miljony hramadzian Biełarusi, i jakaść ich absłuhoŭvańnia i imidž krainy majuć vyrašalnaje značeńnie dla ŭsprymańnia ŭsioj polskaj dziaržavy», — pryvodzić arhumienty Kučynski.
Viedajučy pra abmiežavanyja finansavyja resursy vajavodstvaŭ, paralelna jon źviartajecca da ministraŭ unutranych spraŭ, finansaŭ, zamiežnych spraŭ Polščy pa dapamohu dla miascovaha samakiravańnia ŭ pracesie ŭviadzieńnia biełaruskaj movy na polskich darožnych pierachodach z Respublikaj Biełaruś.
Adnačasova jon prosić adnolkavaj adaptacyi infarmacyjnych došak, aŭdyjo- i vizualnych paviedamleńniaŭ, znakaŭ, jakija vykarystoŭvajucca pamiežnaj, mytnaj i padatkovaj słužbami na ŭsich abjektach pry pierasiačeńni miažy z Respublikaj Biełaruś.
