Apublikavanyja novyja rejtynhi na vybary ŭ Viarchoŭnuju Radu: «Słuha naroda» jašče bolš adryvajecca ad kankurentaŭ
Na parłamienckich vybarach 2019 hoda ŭ Viarchoŭnuju Radu Ukrainy pieraadoleć 5% barjer i patrapić u parłamient zaraz mohuć 5 partyj. Heta — «Słuha naroda» Uładzimira Zialenskaha, prakramloŭskaja partyja «Apazicyjnaja płatforma — Za žyćcio» kuma Pucina Viktara Miedźviadčuka, «Jeŭrapiejskaja Salidarnaść» eks-prezidenta Piatra Parašenki, «Baćkaŭščyna» Julii Cimašenka i novaja partyja frontmiena hurta «Okiean Jelzi» Śviatasłava Vakarčuka «Hołas».
Parłamienckija vybary va Ukrainie adbuducca 21 lipienia. A vyniki sacapytańnia adnosna hałasavańnia za partyi apublikavała sacyjałahičnaja hrupa «Riejtinh».
Pavodle ciapierašnich apytańniaŭ, va ŭkrainski parłamient prachodziać partyi:
- «Słuha naroda» — za jaje hatovyja prahałasavać 48,2% tych, chto maje namier hałasavać i vyznačyŭsia ź simpatyjami. Raniej padtrymka partyi Zialenskaha składała 43,8%.
- «Apazicyjnaja płatforma — za žyćcio» — hatovyja hałasavać 10,7%;
- «Jeŭrapiejskaja Salidarnaść» nabiraje 7,8% hałasoŭ vybarščykaŭ;
- «Baćkaŭščyna» — 6,9% hałasoŭ;
- «Hołas» — 5,6% hałasoŭ.
Niekatoryja partyi pakul što nie zdolnyja pieraadoleć 5% barjer, ale blizkija da hetaha:
- «Honar i siła» Ihara Śmiaško — 4,3% tych, chto maje namier hałasavać i vyznačyŭsia ź simpatyjami;
- «Hramadzianskaja pazicyja» Anatola Hrycenki — 3,0%;
- Radykalnaja partyja Aleha Laško — 2,4%.
Varta adznačyć, što va Ukrainie dziejničaje źmiašanaja vybarčaja sistema. Pałova deputataŭ abirajecca pa partyjnych śpisach, a druhaja pałova — pa adnamandatnych akruhach. Takim čynam finalnaja kanfihuracyja novaha ŭkrainskaha parłamienta moža adroźnivacca ad ciapierašniaha rejtynhu partyj.