Publikacyjaj «NN» pra «biełaruskaha Hansa» aburylisia i Žuk, i Dziemidzienka, i Andrejeva, i Marzaluk
U novaj pieradačy deputata Pałaty pradstaŭnikoŭ Ihara Marzaluka «U abstanoŭcy miru» na telekanale STB była zakranutaja adna z publikacyj «NN».
Ihar Marzaluk. Skryn z ctv.by.
«Na «Našaj Nivie» źjaviłasia infarmacyja pra «biełaruskaha Hansa», takoha «hieroja» ŭ kascy «Vafen-SS», jaki straciŭ voka na Danbasie.
I heta infarmacyja takaja pazityŭna-stanoŭčaja ja b skazaŭ, spakojnaja. Nu voś chłopčyk taki nacyjanał-sacyjalist, ale nie ŭ niamieckim vymiareńni. Hvardyja Hitlera, takija rečy.
Pa-mojmu, heta krasamoŭnaje śviedčańnie taho, jak u internecie, u tak zvanych alternatyŭnych kanałach, jakija znachodziacca nie na terytoryi krainy, čužych kanałach, jakija tranślucca z sumiežnych krain, pakazvajecca vobraz hierojaŭ, jakija słužyli Hitleru. Hieraizujucca biełaruskija kałabaranty, jakija pakazvajucca baraćbitami za niezaležnaść», — adznačyŭ Ihar Marzaluk.
«Kali b taki materyjał pra «hieroja» ŭ kascy SS źjaviŭsia ŭ FRH, to ŭjaŭlaju, što niamieckija pravaachoŭnyja orhany zrabili b. Mała b nie padałosia nikomu», — praciahnuŭ jon.
«Ja skažu toje, za što mianie buduć mocna krytykavać. Skažu jak siabra naziralnaj rady pry MUS. Pakul na takija publikacyi nie buduć reahavać pravaachoŭnyja orhany, prynamsi raźbiracca, ci heta ekstremizm, ci prapahanda nacyzmu, da taho času ich buduć pałaskać. Asabliva ŭ jubilejny hod vyzvaleńnia Biełarusi.
Na moj pohlad, hety materyjał — prosta plavok u bok hramadstva. Ja bačyŭ hety materyjał, jon mianie aburyŭ. Pravavuju acenku pavinny davać pravaachoŭnyja orhany», — adznačyŭ hałoŭny redaktar «Sovietskoj Biełoruśsii» Dźmitryj Žuk.
Cikava, što heta samaj publikacyjaj «NN» aburalisia i na supraćlehłym łahiery. Naprykład, maładafrontaviec Mikałaj Dziemidzienka. Jon napisaŭ:
«Voś cikava: čałaviek za svaju śmiełaść atrymaŭ zvańnie hieroja Ukrainy, ale «samaja patryjatyčnaja hazieta z rysunkami» pry apisańni čałavieka paličyła małanki na kascy bolš važnaj admietnaściu, jakuju varta vynieści ŭ zahałovak».
«U internecie jość dastatkova fotak Rubašeŭskaha ŭ roznych rakursach: i z šaŭronam z «Pahoniaj», i prosta ŭ kamuflažy, ale voś vydańnie vybiraje taki zahałovak, pra runy. Choć navina — pra ranieńnie. Heta hramadzianin Biełarusi, paranieny na vajnie. Zdavałasia b, na hetym usio. Ale paprakać tolki kalehu ŭ abranaj maniery padačy składana. Pakolki zanadta dobra i nie pieršy hod viedaju, jak ŚMI «rekamiendavana» pracavać z temaj. Na žal», — vykazałasia pra publikacyju «NN» žurnalistka telekanała «Biełsat» Kaciaryna Andrejeva.
Voś tak i atrymałasia, što adny ŭbačyli ŭ publikacyi ŭsłaŭleńnie «Hansa», a inšyja naadvarot — ačarnieńnie.
