«Jon Andreja tatam nazyvaŭ»: u Lepieli zabili 3-hadovaha chłopčyka. Padazravanyja — ciažarnaja mama i jaje sužyciel
27 maja z ranicy ŭ Lepieli šukali małoje dzicia. Źnik chłopčyk Jarasłaŭ, jakomu było 2 hady i 8 miesiacaŭ.
Jak paviedamiŭ telehram-kanał Nexta, u milicyju źviarnułasia mama chłopčyka: maŭlaŭ, mały źnik, kali jany hulali ŭ parku. Ale paźniej pravieryli videa: maci išła adna. A zatym znajšli i samoha Jarasłava — u haspadarčaj pabudovie niezdalok ad doma. Chłopčyk byŭ miortvy.
Tut znajšli cieła chłopčyka. Fota: SK
Pakul nieviadomaja pryčyna śmierci małoha. Miascovaja milicyja nie kamientuje zdareńnie.
Viadoma, što chłopčyk žyŭ z mamaj Alenaj. Joj 23 hady, rodam Alena z-pad Lepiela. Jana zavočna vučyłasia na psichołaha ŭ Viciebsku, paśla niekatory čas žyła tam z mužam Maksimam. Naradziłasia dzicia — toj samy chłopčyk Jarasłaŭ.
Praŭda, paśla para razyšłasia, aboje viarnulisia ŭ Lepiel. Syn zastaŭsia z Alonaj. Maksim, baćka małoha, žyvie ź inšaj žančynaj, Alena — z novym sužycielem. Pa słovach svajakoŭ, Alena ŭžo paśpieła zaciažaryć ad novaha kachanka.
Alena, mama chłopčyka.
Pra abaich baćkoŭ siastra Maksima kaža koratka: «Biestałkovyja».
Maksim — zvyčajny rabočy, pracavaŭ to tut, to tam. Alena nie pracavała nidzie, bo była ŭ dekrecie.
Siastra Maksima abvinavačvaje Alenu ŭ złoŭžyvańni ałkaholem. Śćviardžaje, što bačyła žančynu vypiŭšaj, navat kali taja hulała z synam.
Ciapier z Alenaj, najchutčej, pracujuć śledčyja. U jakim jana statusie, pakul što nieviadoma.
Praŭda, siostry Aleny ŭ pjanstvie vinavaciać jaje byłoha muža:
«Alena nie pje! A toj Maksim jakraz amatar vypić — prychodziŭ ź plaškaj piva praviedvać syna. Raskazvaŭ usim, što jon apranaje i abuvaje małoha — a heta rabiła Alena i ja jak chrosnaja maci», — kaža siastra Alony.
Niedzie z hod tamu Alena i Maksim razyšlisia. Alimienty Maksim nie płacić, bo razvod tak i nie afarmlali. Ale chutka paznachodzili sabie novych kachankaŭ i narabili novych dziaciej: sužycielka Maksima paśpieła naradzić ad jaho. Alena sustreła ciapierašniaha sužyciela — Andreja K. i taksama zaciažarała.
Andrej pracuje ŭ lashasie.
Andrej K.
«Charošy chłopiec, Jarasłaŭ jaho navat tatam pačaŭ nazyvać», — kaža siastra Aleny.
Pa słovach žančyny, Andrej na vychodnych byŭ doma, a ranicaj 27 maja źjechaŭ u kamandziroŭku. Telefon u mužčyny vyklučany.
Paźniej Śledčy kamitet paviedamiŭ: i Alena, i Andrej pad vartaj. Śmierć małoha nasiła kryminalny charaktar, ciapier mama chłopčyka i jaje sužyciel padazrajucca ŭ zabojstvie. Zaviedzienaja kryminalnaja sprava.