Vybary ŭ Jeŭraparłamient: uźlot libierałaŭ i zialonych, spad chadekaŭ i sacdemaŭ
Pad kiraŭnictvam Analeny Bajerbok i Robierta Habeka Zialonyja ŭpieršyniu vyjšli na druhoje miesca pa papularnaści siarod partyj Niamieččyny. Fota Alliance / DPA.
Na vybarach u Jeŭraparłamient pieramahli prychilniki jeŭraintehracyi i centrysty: chryścijanskija demakraty, sacyjał-demakraty, libierały i zialonyja.
Kolkaść mandataŭ (u dužkach: kolki dabaviła ci straciła hrupa)
Chryścijanskija demakraty (Jeŭrapiejskaja narodnaja partyja: Mierkiel, Tusk) 178 (—43)
Sacyjał-demakraty (Šulc, Rency) 149 (—42)
Libierały (Makron) 115 (+56)
Zialonyja 75 (+25)
Jeŭropa narodaŭ i svabod (nacyjanalisty, Lo Pen, Salvini, Alternatyva dla Niamieččyny) 74 (+37)
Nacyjanał-kansiervatary (pravyja, siarod ich «Prava i spraviadlivaść» u Polščy i kansiervatary ŭ Brytanii) 63 (—13)
Inšyja nacyjanalisty i papulisty (Partyja Breksita, italjanskaja «Piać zorak» i h.d.) 48
Abjadnanyja levyja («Levyja» ŭ Niamieččynie, Mielanšon u Francyi, Podemos u Ispanii) 42 (—10)
Nacysty, kamunisty, piraty dy inšyja radykały… 13 (—2)
Infahrafika europeelects.eu.
Pieršaje miesca na vybarach u Jeŭrapiejski parłamient, jakija prajšli ŭ apošnija try dni va ŭsich krainach ES, zajmaje błok chryścijanskich demakrataŭ, jaki razam z aljansam sacyjalistaŭ i demakrataŭ dy libierałami zmoža zachavać bolšaść u novym sklikańni.
Ale kali ŭ chryścijanskich demakrataŭ i sacyjał-demakrataŭ kolkaść deputataŭ u ahulnaj stupieni pamienšaje prykładna na 85 miescaŭ, to ŭ aljansu libierałaŭ i demakrataŭ (u jaho ŭvachodziać u tym liku niamieckaja Svabodnaja demakratyčnaja partyja, Aljans za Italiju, Libierał-demakratyčnaja partyja Vialikabrytanii) dadałosia 56 deputataŭ.
Na 25 čałaviek pavialičyli svajo pradstaŭnictva partyi, jakija ŭvachodziać u skład «zialonych» — a heta taksama levyja libierały.
Błok «Jeŭropa nacyj i svabod», u jaki ŭvachodziać francuzskaje «Nacyjanalnaje abjadnańnie», italjanskaja «Liha», hałandskaja «Partyja svabody», dadaŭ 37 miescaŭ. Heta adbyłosia dziakujučy vysokim vynikam u Francyi i Italii.
Ciapierašni skład Jeŭrapiejskaha parłamienta budzie pracavać da 2024 hoda. Jon pavinien budzie dzialić paŭnamoctvy pa kiravańni ES razam ź Jeŭrapiejskaj radaj, farmiravać biudžetnuju kamisiju, kantralavać dziejnaść Jeŭrapiejskaj kamisii.
pixabay.com
Najbolšuju kolkaść deputataŭ u Jeŭraparłamient nakiroŭvaje Hiermanija (96 z 751), za jakoj iduć Francyja (74), Italija i Vialikabrytanija (pa 73), Ispanija (54), Polšča (51). Najmienšaja kolkaść deputataŭ (pa 6) — Luksiemburh, Kipr, Estonija i Malta.
