Pra što pišuć bujnyja biełaruskija biznesoŭcy ŭ sacyjalnych sietkach
U sacsietkach možna pačytać razvahi palitykaŭ, litarataraŭ, błohieraŭ i ich reakcyi na padziei ŭ Biełarusi i śviecie. A voś biznesoŭcy, asabliva kali ŭ ich bujnyja pradpryjemstvy, nie tak časta ličać za lepšaje vykazvacca.
My pahladzieli, pra što pišuć takija ŭpłyvovyja ŭ śviecie biznesu ludzi, jak Viktar Prakapienia i Leanid Tomčyn, Uład Łunievič i Viktar Babaryka, u svaich sacyjalnych sietkach.
Viktar Prakapienia: vinšuje z Dniom Voli i padtrymlivaje Tut.by
Viadomy ajcišnik, zasnavalnik inviestycyjnaj kampanii VP Capital Viktar Prakapienia karystajecca fejsbukam nie duža časta, ale dastatkova ŭdała. Zvyčajna jahonyja pasty nabirajuć šmat łajkaŭ i pierapostaŭ.
Apošni vialiki dopis Viktara Prakapieni byŭ datavany žniŭniem minułaha hoda. Pradprymalnik nie pabajaŭsia ŭstać na abaronu partała Tut.by, kali ŭ ich redakcyju pryjšli ź pieratrusam supracoŭniki Śledčaha kamiteta.
«Mienavita žurnalisty dazvalajuć nam bačyć, što nasamreč adbyvajecca, što važna, što maje značeńnie i što patrabuje ŭvahi. Kali jany buduć pračynacca pa načach 10 razoŭ ad stresu, to my stracim hetuju samuju dalikatnuju suviaź i zdolnaść razmaŭlać pamiž saboj. Žurnalisty — heta tyja ludzi, jakija źviartajuć uvahu hramadstva na prablemy i dazvalajuć ich vyrašać. Heta ciažkaja praca, ad jakoj šmat u čym zaležyć, jak my žyć budziem. Hramadstva pavinna stasavacca, inakš my stracim suviaź z realnaściu. Heta nieminučy šlach da katastrofy», — napisaŭ Prakapienia. Toj jahony dopis nabraŭ bolš za tysiaču łajkaŭ.
Prakapienia padtrymaŭ dopisam i spravaj prajekt videahutarak, jaki pačała žurnalistka Nastaśsia Barancava. Jon nie prosta prarekłamavaŭ intervju z saboj, ale i paabiacaŭ čałavieku, jaki prapanuje samaha cikavaha surazmoŭcu i składzie pytańni da jaho, hadzińnik Garmin Fenix 5s, jaki mieraje puls i ŭzrovień stresu.
Na Dzień rodnaj movy Prakapienia adhuknuŭsia takim dopisam u svajoj stužcy: «Biełarusy — vy nievierahodnyja! Byŭ momant, kali ja straciŭ vieru ŭ toje, što ŭ Biełarusi možna stvarać hramadzianskuju supolnaść, jakaja budzie aktyŭna ŭdzielničać u žyćci krainy. Ale ja atrymaŭ ad vas sotni idej pa palapšeńni ŭmoŭ adukacyi ŭ Biełarusi i ŭ mianie ŭžo niama sumnievaŭ. Ja za doŭhi pieralot pračytaŭ amal usie vašyja prapanovy i nievierahodna ŭražany. My atrymali listy ad vielizarnaj kolkaści vykładčykaŭ, nastaŭnikaŭ, kiraŭnikoŭ — samych roznych biełarusaŭ. Ciapier ja ŭpeŭnieny: u našaj krainie žyvuć sapraŭdy razumnyja, aktyŭnyja ludzi, jakija mohuć i chočuć». Hety post Viktar Prakapienia napisaŭ pa-biełarusku.
Na Dzień Voli Prakapienia adznačyŭsia jašče adnym karacieńkim dopisam na biełaruskaj movie: «Sa śviatam, biełarusy».
Leanid Tomčyn: pra sumleńnie i jaŭrejskuju spadčynu
«Turbujciesia bolš pra svajo sumleńnie, čym pra svaju reputacyju. Tamu što tvajo sumleńnie — heta toje, čym ty jość, a tvaja reputacyja — heta toje, što dumajuć pra ciabie inšyja. A toje, što jany dumajuć pra ciabie, — heta ich prablema», — heta cytata sa staronki staršyni Rady dyrektaraŭ chołdynha «Apteka-hrup» Leanida Tomčyna.
Ułaśnik najbujniejšaj sietki niedziaržaŭnych aptek Tomčyn viadzie admietny i jarki fejsbuk. «Kali časta hladzieć rasijskaje TB, to atrymajecca, što Rasija — heta maleńkaja kraina, jakaja z usich bakoŭ akružanaja Ukrainaj», — źmiaščaje Tomčyn na svajoj staroncy iraničnuju cytatu rasijskaha akciora Valancina Hafta.
Viciebski biznesmien pryciahvaje da siabie ŭvahu nie tolki adkrytaj hramadzianskaj pazicyjaj (naprykład, asudžeńniem stalinskich represij), ale i jarkimi krokami na svaim pradpryjemstvie. Naprykład, jahonaja aptečnaja sietka admysłova pačała brać na pracu piensijanieraŭ, kab pakazać, jak možna zmahacca z ejdžyzmam.
Šmat uvahi spadar Tomčyn nadaje pytańniam jaŭrejskaj spadčyny Biełarusi. Naprykład, u pačatku hoda jon pastaviŭ sabie na avatarku «My pomnim. Tydzień pamiaci achviaraŭ Hałakostu». Biznesoviec byŭ siarod tych, chto inicyjavaŭ adradžeńnie tradycyi čytańnia Tory ŭ viciebskaj sinahozie. «My heta zrabili!» — tak prakamientavaŭ jon hetuju navinu. Uvohule, Tomčyn aktyŭna biare ŭdzieł u hramadskim žyćci sinahohi «Oel David».
Zusim nie dziŭna, što važnym punktam u pamiaci Leanida Tomčyna zastajecca Druhaja suśvietnaja vajna. Jon pamiataje pra achviaraŭ Chałakostu, a pieramohu ličyć adnoj z najvažniejšych padziej u historyi našaj krainy.
Ivan Michnievič: kiprskaja realnaść
Ivan Michnievič byŭ adnym z zasnavalnikaŭ kampanii Wargaming. Apošnimi hadami žyvie na Kipry. Štodzionnaść hetaha vostrava Michnievič prymaje vielmi blizka da serca. U 2017 hodzie jon pajšoŭ u kiprskuju palityku. Biznesoviec razam z paplečnikami zasnavaŭ partyju «Eha a palicis» («Ja — hramadzianin»). Kiraŭnictva partyi składajuć ruskamoŭnyja hramadzianie Kipra, lidaram źjaŭlajecca ŭradženiec Urała — Alaksiej Vałabojeŭ.
U svaich intervju biznesoviec kazaŭ, što sprabuje źmianić Kipr, a nie radzimu, bo ŭ «Biełarusi heta ŭ pryncypie niemahčyma». Mienavita pra Kipr i piša Michnievič na svaich staronkach u sacsietkach. Za apošni hod na Kipry adbyłosia niekalki zabojstvaŭ mihrantaŭ. Viadoma, što «ruskaja partyja» adrazu ŭčapiłasia ŭ heta, kab krytykavać ułady.
«Jak śvieckaja ŭłada (prezident), tak i relihijnaja ŭłada (archijepiskap) demanstrujuć žachlivuju abyjakavaść i nierazumieńnie pačućciaŭ i emocyj svajho naroda. Dla adnaho — heta chałatnaść i nieprafiesijanalizm, dla druhoha — čerstvaść i čałaviekanienaviśnictva, niedapuščalnyja dla chryścijanina. Šmatlikija zabojstvy, učynienyja pry papuščalnictvie i chałatnaści ŭładaŭ, jakija tak aburyli narod, — heta niazručnaje dla adnaho, i niaznačnaje — dla druhoha. Takija ludzi nie majuć maralnaha prava być lidarami svajho naroda», — napisaŭ u pačatku maja Michnievič. Praŭda, pad hetym dopisam jon sabraŭ usiaho try łajki.
Vielmi šmat i inšych padobnych dopisaŭ. Vyhladaje, što na siońnia heta asnoŭnaja tema, na jakoj partyja «Ja — hramadzianin» sprabuje zarabić svoj palityčny kapitał. «Znachodžańnie inšaziemcaŭ ź ES ci trecich krain na terytoryi Respubliki Kipr — na svoj strach i ryzyku. Palicyja ŭ krainie de fakta nie cikavicca zabojstvami inšaziemcaŭ. Na siońniašni dzień ni adzin palicejski, jaki tarmozić praces, nie panios nijakaj adkaznaści!» — takija emocyi ŭ Michnieviča vyklikała zabojstva ŭ Kipry łatvijskaha padletka.
Zrešty, časam Michnievič adpačyvaje ad palityki i moža zapościć niešta niezvyčajnaje z žyćcia na paŭdniovaj vyśpie. Naprykład, u siaredzinie krasavika na Kipry vypaŭ śnieh. Pryčym nie ŭ harach, a niedaloka ad mora. Byvaje i takoje.
A voś biełaruskaja realnaść dla Ivana Michnieviča stanovicca ŭsio mienš pryvablivaj i cikavaj, tamu i dopisaŭ na hetuju temu amal niama.
Viktar Babaryka: palityčnaja satyra i kraŭdfandynh
Aktyŭny ŭ sacyjalnych sietkach i staršynia praŭleńnia AAT «Biełhazprambank» Viktar Babaryka. Naprykład, jon moža absalutna spakojna ŭziać i źmiaścić žartaŭlivy płakat dyzajniera Uładzimira Ceślera ab tym, jak by vyhladała hara Rašmar, kali b jana była ŭ Biełarusi. Zrazumieła, čyj tvar tam možna pabačyć.
«Voś čamu tak adbyvajecca? Nie chočaš pisać krytyčnych pastoŭ pra našu IT-krainu abo vyśviatlać, jaki ž taki važki ŭkład u kaznu ŭnosiać našy prahramisty, ale tut ža miesca zanudy chto-niebudź i zajmaje. I heta nie «najmity varožaha śvietu kapitału» abo «žyda-masonskaj mafii», a samaja, što nazyvajecca, prahresiŭnaja i praŭdzivaja hazieta «Sovietskaja Biełaruś». Adkryvaju dadatak da hetaj haziety «Sajuz» za 07.03.19 i znachodžu ŭ kałoncy pošta «Sajuza» nastupnuju infarmacyju.
Zarobak u našych IT-śpiecyjalistaŭ kala 4,5 tys. rubloŭ, a padachodnaha padatku jany, niahledziačy na lhotnyja staŭki, płaciać u 3,2 razy bolš. I tut ža zadajusia ja pytańniem: nu chiba heta nie dyviersija? Chiba heta nie žadańnie zhańbić stanoŭčy imidž hetych vydatnych chłopcaŭ?
Ź jakoj metaj pryviali hetyja dźvie ličby razam, kali nie z padryŭnoj? Bo luby čałaviek, navat z vydatnaj adznakaj pa pracy i fizkultury i trojkaj pa matematycy tut ža zrobić paraŭnańnie: siaredniaja zarpłata ŭ nas pa krainie niachaj narešcie budzie 1 tys. rubloŭ. Značyć, prahramist atrymlivaje ŭ 4,5 razy bolš. Ale čamu padatkaŭ jon płacić u 3,2 razy bolš? Bo ŭ nas płoskaja škała padatkaabkładańnia. «Dzie ž spraviadlivaść?» — zalamantuje luby biełarus?» — piša Babaryka.
Bankir šmat pijaryć inicyjatyvy svajho banka, asabliva kulturnickija. Naprykład, na Noč muziejaŭ «Biełhazprambank» rychtavaŭ vystavu tvoraŭ mastactva ŭ Breście. A ŭ krasaviku na tusovačnaj vulicy Kastryčnickaj źjaviŭsia novy art-abjekt. Jašče Babaryka šmat dapamahaje samym roznym kraŭdfandynhavym prajektam. A prastoraj «Ulej» kiruje jahony rodny syn.
Juryj Mielničak: Pra PVT i jak možna kupić dom mary
Zasnavalnik Maps.me Juryj Mielničak nie adstaje ŭ sacyjalnaj aktyŭnaści. Nie tak daŭno jon šukaŭ najlepšuju joha-studyju ŭ Minsku, kab tam była aštanha-joha. A jašče vykładaŭ abviestku, što pradaje niedabudavany dom pad Łahojskam.
«U pasiołku kruhłasutačnaja achova, abharodžanaja terytoryja, internet-optavałakno, svaja hłybokaja artezijanskaja śvidravina z čystaj vadoj i h.d. Pobač katałka na snoŭbordzie i vejku, voziera ź plažam, łaźnia (u tym liku pa-čornamu), trenažornaja zała, restaran ź dziciačaj hrupaj», — tak apisaŭ dom mary Mielničak.
«Vinšavać z 8 Sakavika fieministak norm ci niepryhoža?» — mabyć, iranična pytajecca Mielničak.
U pačatku sakavika IT-šnik pisaŭ nastupnaje: «Minułaj nočču ja daviedaŭsia, što Eryk Hundarsen z CEO Mapbox nie ŭpuścili ŭ Rasiju i departavali nazad u Chielsinki, adkul jon prylacieŭ. Jon lacieŭ z Chielsinki ŭ Minsk ź pierasadkaj u Maskvie, kab vystupić na Bulbacon. Akazałasia, što pa źbiehu abstavinaŭ i pamyłak jaho dadali i ŭ biełaruski śpis nieŭjaznych. U 2 hadziny nočy ja ŭ adčai napisaŭ Usievaładu Jančeŭskamu, dyrektaru PVT, i paprasiŭ dapamahčy. I ździviŭsia, što a 2:05 (!) jon adkazaŭ i paabiacaŭ zaniacca hetym pytańniem. A rana ranicaj jon źviazaŭsia z MUS i mihracyjnymi ŭładami i vypraviŭ situacyju! Eryk prylacieŭ pramym rejsam u Minsk u toj ža dzień i ciapier vystupaje na kanfierencyi. A ja staju i dumaju, što nie viedaju, dzie jašče, akramia Biełarusi i PVT, hetaje pytańnie mahło b vyrašycca za paru hadzin. Dziakuj PVT i asabista Usievaładu Jančeŭskamu za takuju ŭciahnutaść, dziakujučy jakoj Eryk ciapier dzielicca svaim dośviedam pabudovy adnaroha z pradprymalnikami ŭ Minsku», — hety dopis nabraŭ paŭtysiačy łajkaŭ.
Što jašče možna daznacca sa staronki Mielnička? Naprykład, što dyzajn lidskich kiedaŭ byŭ «styrany ŭ adydasa», a jašče jon nazyvaje admienu vizaŭ dla zamiežnikaŭ i abnaŭleńnie PVT najlepšym, što adbyłosia ŭ Biełarusi za apošni čas.
Uład Łunievič: vino i padarožžy
Uład Łunievič adkryŭ šmat prystojnych restaranaŭ i kaviarniaŭ na minskaj Kastryčnickaj vulicy. Naprykład, słavutuju blinnuju «Depo». U fejsbuku jon vykładaje svaje zdymki z padarožžaŭ. Naprykład, nie tak daŭno Łunievič byŭ u Bielhii i Italii.
Pry hetym jon nie praminaje mahčymaści naviedacca ŭ restarany hetych krain, kab adznačyć niešta dla siabie.
Padarožničaje jon i pa Biełarusi. Naprykład, fotku ź Niaśvižskaha zamka jon padpisaŭ tak: «Padsiłkavacca enierhijaj».
Ź jahonaha instahrama možna zrabić vysnovu, što Łunievič lubić Minsk, vino i dobryja zdymki.
