Usie paciarpiełyja ŭ avaryi ŭ Karpatach viarnulisia dadomu. Šaściora ź ciažkimi traŭmami znachodziacca ŭ balnicach
15 maja apošnija ŭdzielniki račnoha spłavu ŭ Karpatach, u jakim zahinuła troje biełarusaŭ, viarnulisia ŭ Biełaruś. Na čyhunačnym vakzale paciarpiełych sustrakali reanimabili.
Pra heta «Našaj Nivie» raskazaŭ udzielnik spłavu Maksim Karaleŭski.
Čytajcie taksama: Stali viadomyja imiony biełarusaŭ, jakija zahinuli ŭ žachlivaj avaryi ŭ Karpatach FOTY
«Šaściora čałaviek z traŭmami pazvanočnika, ź pierałomami rebraŭ i taza, rvanymi ranami ŭsio jašče znachodziacca ŭ biełaruskich balnicach. Niekatoryja pa prahnozach daktaroŭ nie zmohuć chadzić jašče niekalki miesiacaŭ. U adnoj paciarpiełaj čerapna—mazhavaja traŭma, składany pierałom kostak taza, jašče u adnaho z paciarpiełych — razryŭ aboich lohkich. Spatrebicca doŭhaja reabilitacyja, jakaja patrabuje i času, i hrošaj. Ale hałoŭnaje, što ŭsie doma i što žyćciu hetych chłopcaŭ i dziaŭčat bolš ničoha nie pahražaje».
Paciarpiełyja ŭ Biełaruś viartalisia na ciahniku.
Maksim Karaleŭski raskazaŭ, što z dastaŭkaj paciarpiełych byli peŭnyja prablemy.
«Ukrainskija daktary nie chacieli brać na siabie adkaznaść i nie davali dazvołu na transparciroŭku paranienych. Nastojvali, kab dalečvalisia va Ukrainie. A sami paciarpiełyja i ich siemji nastojvali na viartańni ŭ Biełaruś. Tamu treba było prymać rašeńnie ab viartańni. U niekatorych turystaŭ adsutničała miedycynskaja strachoŭka, tamu ŭźnikli pytańni, jakim čynam buduć apłačvacca pasłuhi chutkaj dapamohi. Da taho ž, paŭtarusia, pastanovy ad ukrainskich daktaroŭ nie było, tamu daktary biełaruskija nie mahli supravadžać paciarpiełych. Prynamsi, kab samim apłacić pasłuhi reanimabila i supravadžeńnie dvuch daktaroŭ, treba było zapłacić 5 400 biełaruskich rubloŭ», — raskazvaje Maksim.
Maksim Karaleŭski adznačaje, što ŭkrainskija daktary pajšli nasustrač i za miedycynskaje absłuhoŭvańnie ŭ balnicach Ivana-Frankoŭska i Vierchaviny navat nie vystavili rachunak.
«My za svoj košt nabyvali chłopcam i dziaŭčatam leki, prynosili ježu. A za absłuhoŭvańnie, za apieracyi, za kojka-miescy ŭkrainskija daktary hrošaj nie ŭziali, za što im vialiki dziakuj. Bolš za toje, daktary Vierchaviny navat za leki nie paprasili ni kapiejki», — kaža Maksim.
Zahinułych dastavili ŭ Biełaruś praz dva dni paśla zdareńnia. Jaŭhiena Ivanova pachavali 9 maja, Tamaru Ašuchinu i Anhielinu Juškievič — 10 maja.
«Z dastaŭkaj zahinułych byli peŭnyja prablemy. My sprabavali zrabić heta jak maha chutčej. Trahiedyja zdaryłasia na majskija śviaty, i šmat chto z ustanoŭ ci nie pracavaŭ, abo pracavaŭ pa skaročanym hrafiku, a taksama toje, što ŭ Vierchovinie nie było mnohich ustanoŭ, typu pierakładčykaŭ i nataryusaŭ, mytnaj słužby, što značna ŭskładniała i zapavolvała praces. U konsulstvie ž nie razumieli, čym jany nam mohuć dapamahčy. My sami damaŭlalisia z ahienctvami, jakija zajmajucca dastaŭkaj zahinułych. Za kožnaha z zahinułych zapłacili kala 1000 dalaraŭ. Ale, vidać, kali svajaki vyjšli na Ministerstva zamiežnych spraŭ, praces paskoryŭsia», — kaža Maksim.
Pra zahinułych Maksimu havaryć ciažka. Jaŭhien Ivanoŭ i Tamara Ašuchina byli blizkimi siabrami Maksima.
«Ja adčuvaju svaju nie, nie vinu, adkaznaść za ŭsich, chto trapiŭ u hetuju trahičnuju historyju. Tamaru i jaje chłopca Siarhieja ja ŭhavaryŭ pajechać u Karpaty. Ź Jaŭhienam, jaki byŭ arhanizataram spłava, ja znajomy z padletkavaha ŭzrostu. Mnie vielmi baluča čuć, što niekatoryja ciapier vinavaciać Jaŭhiena ŭ tym, što jon nie pakłapaciŭsia pra strachoŭki dla ŭdzielnikaŭ pachodu. Ja hutaryŭ z žonkaj Jaŭhiena Taćcianaj. Siamja Jaŭhiena padkreślivaje, što admaŭlajecca ad luboj materyjalnaj dapamohi. I što jany sami hatovyja padtrymlivać hrašyma tych, chto paciarpieŭ», — raskazvaje Maksim.
Adna z udzielnic pachodu, Volha Stankievič, raskazvaje:
«Kali Ženia ŭdakładniaŭ ŭ mianie pra pajezdku, jon mnie rekamiendavaŭ zastrachavacca, pavodle jaho rekamiendacyi ja i Kościa z Kaciaj zastrachavalisia. Sam jon u apošni momant pieradumaŭ z-za čarhi na miažy, kab nie zatrymlivacca. Jašče dadam, što i ukrainskija daktary, i miascovyja žychary akazvali nam raznastajnuju dapamohu, chto čym moh. Prostyja ludzi akazalisia bolš sardečnymi i spahadnymi, čym tyja, chto vinavaty ŭ zdareńni. Haspadar atelu całkam moh sabie dazvolić akazać tak nieabchodnuju nam materyjalnuju padtrymku, ale nie zrabiŭ hetaha. «
Ukraina zaviała dźvie kryminalnyja spravy. Suprać kiroŭcy, pa vinie jakoha adbyłosia DTZ, u jakim zahinuli ludzi. Pa hetym artykule kiroŭcu moža pahražać da 10 hod źniavoleńnia. A taksama kryminalnaja sprava ŭzbudžanaja suprać kiraŭnika hramadskaj arhanizacyi «Fiederacyja raftynhu Prykarpaćcia», u hateli jakoha spyniłasia hrupa, i jaki zajmaŭsia arhanizacyjaj spłavaŭ i arhanizacyjaj transparciroŭki.
«Jak adbyłosia, što mašyna źjechała ŭ raku? Tyja, chto byŭ u kabinie z kiroŭcam, havaryli, što mašyna padymałasia ŭharu. Vadziciel chacieŭ pieraklučyć pieradaču na bolš nizkuju, kab mašynie było lahčej. Ale niešta tam zaklinavała ŭ karobcy pieradač. Kiroŭca sprabavaŭ nacisnuć na tarmazy, ale mašyna praciahvała nakacikam skočvacca nazad. Darečy, uzbočynu ad abryvu adździalała tolki adno bierviano. I jano HAZ nie spyniła», — raskazvaje Maksim.
Prykra ŭ hetaj historyi toje, što kiraŭnik «Fiederacyi raftynhu Prykarpaćcia» nie pryznaje svaju vinu.
«Spačatku jon vybačaŭsia, abiacaŭ zapłacić usie vydatki paciarpiełych, a paśla pahutaryŭ sa svaim advakatam i pierarvaŭ usie adnosiny ź ludźmi, jakija paciarpieli praź niaspraŭnuju mašynu. Advakat jamu zabaraniŭ hutaryć z paciarpiełymi. Ich pazicyja ŭ tym, što jany nievinavatyja. Baluča na heta hladzieć. Niespraviadliva heta, kali čałaviek u situacyi, kali zahinuli troje ludziej, ratuje tolki svaju škuru», — uzrušajecca Maksim Karaleŭski.
Adkrytyja dabračynnyja rachunki.
«Treba apłacić pasłuhi daktaroŭ, pasłuhi advakataŭ. Padtrymać siemji zahinułych, paciarpiełych. Ja viedaju, što hrašyma ničoha nie papraviš. Ale ludzi nie pavinny zastavacca adnyja sa svajoj biadoj. Ludziam patrebna viedać, što ich padtrymlivajuć, što jany nie pakinutyja», — padsumavaŭ Maksim Karaleŭski.
