Zialenski apublikavaŭ fota z suviaznoj UPA i vieteranam Savieckaj armii
Novaabrany prezident Ukrainy Uładzimir Zialenski u Dzień pamiaci i prymireńnia, jaki Ukraina adznačaje 8 maja, pažadaŭ ukraincam miru i adzinstva.
Pra heta jon napisaŭ na svajoj staroncy ŭ fejsbuku, apublikavaŭšy fatahrafiju, na jakoj staić z suviaznoj Ukrainskaj paŭstanckaj armii i kapitanam marskoj piachoty VMF SSSR.
«Ivan Anikiejevič Załužny. 10 maja jamu spoŭnicca 101 hod. Kapitan pieršaha ranhu marskoj piachoty VMF SSSR, udzielnik Druhoj suśvietnaj vajny. Uznaharodžany šmatlikimi ordenami i miedalami. Straciŭ adzinaha ŭnuka — Ivana Hutnika-Załužnaha — padčas vajny ŭ Danbasie», — raskazaŭ Zialenski ab mužčynie.
«Praskoŭja Vasileŭna Zielančuk-Paciak. U 13 hadoŭ stała suviaznoj u UPA. Pieradavała infarmacyju, pravijant, viazała švedry», — dadaŭ jon.
Zialenski napisaŭ, što ŭ Dzień pamiaci i prymireńnia my šanujem usich i schilajemsia pierad usimi, chto zmahaŭsia suprać nacyzmu i zahinuŭ za Ukrainu ŭ hady Druhoj suśvietnaj vajny.
«Pierad kožnym, chto addaŭ svajo žyćcio dziela miru. Miru, jaki siońnia tak treba Ukrainie. Miru, zarukaj jakoha stanie adzinstva ŭsich ukraincaŭ», — dadaŭ jon.