SBU: Śpiecsłužby Rasii rychtavali terakt na arsienale sa stratehičnymi zapasami rakiet
Vybuchi na składach z bojeprypasami ŭ Čarnihaŭskaj vobłaści i pažar adbyvalisia z 9 pa 24 kastryčnika 2018 hoda. Fota: informator.ua
«Supracoŭniki vajskovaj kontrraźviedki SBU papiaredzili padrychtoŭku śpiecsłužbami RF terarystyčnaha aktu na adnym z arsienałaŭ Uzbrojenych sił Ukrainy, na jakim zachoŭvajucca stratehičnyja zapasy najnoŭšych rakiet i bojeprypasaŭ», — havorycca ŭ paviedamleńni SBU.
Na pačatku 2019 hoda rasijskija śpiecsłužby zavierbavali supracoŭnika arsienała z vykarystańniem psichałahičnaha ŭździejańnia i cisku, «pahražajučy biaśpiecy svajakoŭ słužačaha, jakija pražyvajuć na časova akupavanych terytoryjach Danbasa».
«Pierad rabotnikam arsienała byli pastaŭlenyja zadačy pa zbory i pieradačy infarmacyi… Atrymanuju infarmacyju kraina-ahresar płanavała vykarystać dla dyviersij na stratehičnym vajskovym abjekcie dla padryvu abaranazdolnaści Ukrainy», — adznačyli ŭ SBU.
Zavierbavanamu ŭkraincu abiacali materyjalnuju dapamohu i hramadzianstva Rasii z afarmleńniem piensii, jaho taksama zabiaśpiečyli srodkami suviazi dla pieradačy infarmacyi.
«Kaardynacyju jaho dziejnaści kuratary ažyćciaŭlali z terytoryi RF praź internet. Dziakujučy svoječasovamu reahavańniu supracoŭnikaŭ vajskovaj kontrraźviedki SBU ŭdałosia papiaredzić ŭciahvańnie ŭkrainskaha hramadzianina ŭ supraćpraŭnuju dziejnaść na škodu nacyjanalnym intaresam Ukrainy», — padkreślili ŭ SBU.
Za apošnija čatyry hady ŭ Ukrainie uzryvalisia niekalki arsienałaŭ, nahadvaje gordonua.com.
29 kastryčnika 2015 hoda zaharelisia składy Minabarony ŭ horadzie Svatava Łuhanskaj vobłaści, dzie znachodziłasia kala 3,5 tys. ton bojeprypasaŭ.
23 sakavika 2017 hoda pačalisia vybuchi na arsienale bojeprypasaŭ u Bałakleje Charkaŭskaj vobłaści.
26 vieraśnia 2017 hoda — na arsienale ŭ Kalinaŭcy pad Vinicaj.
U noč na 9 kastryčnika 2018 hoda pačali vybuchać bojeprypasy pad Ičniaj ŭ Čarnihaŭskaj vobłaści, 24 kastryčnika pažar na terytoryi arsienała byŭ likvidavany.
