Biełaruskaja dyzajnierka robić torby z vyjavaj žanočych hrudziej u padtrymku tych, chto pieražyŭ rak FOTA
Dyzajnierka Alaksandra Šynkievič robić šopiery (heta takija torby na plačo) z vyjavaj žanočych hrudziej. Reč źjaviłasia ŭ padtrymku žančyn, jakija pieražyli rak małočnaj załozy.
Alaksandra raskazała «Našaj Ninie», adkul pryjšła ideja i chto kuplaje takija torby.
«Jak heta zaŭsiody byvaje, ideja pryjšła całkam vypadkova i znajšła mianie ŭ instahramie. Ja hartała stužku i ŭbačyła post błohierki Zoi Pryšyvałki pra toje, što jana vielmi choča zajmieć takuju torbu. A pierad hetym ja jakraz skončyła adukacyjnyja kursy pa hrafičnym dyzajnie ŭ vykładčycy Paliny Chamiakovaj, mianiała śfieru dziejnaści, była biez stałaj pracy, tamu času i idej u mianie było šmat. I voś tut mnie traplajecca na vočy artykuł pra toje, jak žančyny pieražyli nastupstvy hetaj strašnaj chvaroby — raka hrudziej. Mianie zachapili hetyja historyi. Tak stvareńnie torbaŭ zajmieła jašče i sacyjalny sens», — raskazvaje dyzajnierka.
Na siońnia Saša Šynkievič pašyła kala 25 sumak.
«Maje zamoŭcy — ludzi roznych uzrostaŭ i rodu zaniatkaŭ. Siarod ich kreatyŭnyja studenty, jakija lubiać jarkija i niezvyčajnyja rečy. Ludzi starejšaha ŭzrostu, jakija stvarajuć svaje cikavyja prajekty i žyvuć nasyčanym aktyŭnym žyćciom. Jość i tyja, kaho niepasredna zakranuła prablema raka, tyja, chto prytrymlivajecca idei roŭnaści ŭ pryhažości i mahčymaściach niezaležna ad źniešnaści. Siabry taksama vyrašyli patrymać majo zachapleńnie i nabyli niekalki sumak», — dzielicca Alaksandra.
Kaštuje takaja torba 33 rubli.
Sumki biełaruskaj dyzajnierki možna sustreć nie tolki ŭ minskich modnic. Ich zamaŭlali navat ź Finlandyi. A adna sumka razam sa svajoj haspadyniaj udzielničała ŭ fieminisckim maršy ŭ Barsiełonie.
