Što my słuchali ŭ krasaviku: dziasiatka najbolš značnych muzyčnych albomaŭ miesiaca
Jak zaŭsiody, na pačatku miesiaca my padbirajem dziasiatku najbolš značnych, na naš pohlad, muzyčnych navinak. Pryjemna, što ź ich try — biełaruskaj vytvorčaści.
AKUTE — V
Svoj piaty albom mahiloŭski hurt stvaraŭ i zapisvaŭ svaimi siłami, vyrašyŭšy źmianić hučańnie. Firmovy hitarny saŭnd sastupiŭ miesca inšym instrumientam i novym muzyčnym sprobam.
U vyniku atrymaŭsia vielmi niecharakterny albom, jaki, miarkujecca, publika budzie doŭha smakavać i znachodzić niešta dla siabie novaje.
Weyes Blood — Titanic Rising
Čaćviorty albom amierykanki Natali Mierynh byŭ vielmi vysoka acenieny muzyčnymi krytykami i słuchačami. Vybudavaŭsia navat śpis vykanaŭcaŭ, jakimi natchniałasia śpiavačka pry stvareńni novych piesień — ad Boŭi da LCD Soundsystem.
Ale ŭ toj ža čas, navat kali muzyka Weyes Blood padobnaja da niečaj, jana absalutna aŭtentyčnaja. Pasłuchajcie, ale rabicie heta sfakusavana i doŭha.
alyona alyona — Puška
Pra hety reliz i muzyčnuju źjavu pad nazvaj alyona alyona my pisali na pačatku krasavika. Ale ŭ muzyčnych vynikach miesiaca nijak nielha abyścisia biez hałoŭnaj zorki ŭkrainskaha repu.
Kali vy jašče nie čuli, to pasłuchajcie, a potym zacanicie klipy. A tym, chto ŭžo znajomy z tvorčaściu Aleny Saŭranienka, — dobraja nahoda pierasłuchać «Pušku».
LSD — Labrinth, Sia & Diplo Present… LSD
LSD — heta muzyčny kalektyŭ, jaki składajecca z brytanskaha muzyki Labrinth, aŭstralijskaj śpiavački Sia i amierykanskaha pradziusara Diplo.
Abjadnaŭšysia letaś dla sumiesnaj tvorčaści, LSD zapisali šeść sinhłaŭ, a ŭ krasaviku zapisali debiutny albom. Viasiołaja psichadeličnaja vokładka ŭ styli płytak 60-ch namiakaje na raznažanravy kalejdaskop unutry.
Tak jano i jość. Pasłuchajcie:
The Chemical Brothers — No Geography
Zapisvajučy svoj dziaviaty albom, «chimičnyja braty» vyrašyli admovicca ad usiaho muzyčnaha abstalavańnia, što nakapiłasia za 20 hod. Vykinuć bałast, jaki rabiŭ ich saŭnd krychu pradkazalnym, i pazabaŭlacca tak, jak jany rabili ŭ maładości.
Palina — Hrustnyje pieśni
Raniej Palina Respublika śpiavała svaje praniźlivyja pieśni pad hitaru. Ciapier Palina śpiavaje sumnyja pieśni pad elektronnyja rytmy, ale praniźlivaść nikudy nie źnikła.
U albomie, muzyka jakoha składałasia apošnija try hady razam z rasčaravańniami i emocyjami, Palina zastajecca maksimalna ščyraj.
Cage The Elephant — Social Cues
Jak ža pryjemna pasłuchać dobraje indy ŭ čas biaskoncych ekśpierymientaŭ, kali niekali kultavyja kalektyvy skatvajucca to ŭ elektronščynu, to ŭ niešta nakštałt papsy.
Ale mesedž alboma nie taki pazityŭny: jon zapisany paśla razvodu frontmena Meta Šulca, śmierci jahonaha stryječnaha brata i blizkaha siabra. Taksama ŭ im jość razvažańni pra depresiju i advarotny bok žyćcia rok-n-rolščykaŭ.
Vasia Obłomov — Etot priekrasnyj mir
Šykoŭny ŭ svajoj biespraśvietnaści albom.
U im možna adsačyć, jak liniejny siužet ab žyćci čałavieka va ŭmovach sučasnaj Rasii ad naradžeńnia da śmierci, tak adsyłki da impatencyi palityčnaj baraćby, dzie praciŭniki ŭłady zmahajucca ź joj łajkami i fłešmobami, a taksama iraničnyja pieśni pra suvoruju rečaisnaść, u jakoj biełarus taksama znojdzie šmat znajomaha.
Recha — Žyvak
Žyvak — pieśni, napisanyja hurtom Recha ciaham 10 hadoŭ i zapisanyja žyŭcom za adzin viečar. Hety albom najbolš adpaviadaje kancertnamu hučańniu Recha pieryjadu 2009—2017 hadoŭ.
Ciapier hurt šukaje novuju mastackuju movu, stvaraje novy muzyčny materyjał, ale Žyvak zastajecca etałonnaj pracaj, tvorčym i žyćciovym padsumavańniem.
The Cranberries — In The End
15 studzienia 2018 hoda stała viadoma ab śmierci vakalistki The Cranberries Dałores O'Ryardan.
Materyjał byŭ zapisany za dva tydni da trahiedyi. Hurtu spatrebiŭsia hod, kab zrabić ź jaho raźvitalny albom i pastavić kropku ŭ svajoj tvorčaści.
Našy papiarednija ahlady:
