Premjera «Mściŭcaŭ: Finał», što adbyłasia ŭ Minsku apoŭnačy, vyklikała vielizarny ažyjataž FOTY
U Biełarusi apoŭnačy adbyłasia premjera filma «Mściŭcy: Finał» z kinasuśvietu Marvel. U pieršy ŭik-end prakatu pa ŭsim śviecie było sabrana 1,2 miljarda dalaraŭ — heta novy suśvietny rekord pa zborach.
U Rasii, a śledam i Biełarusi, jana była zapłanavana na 29 krasavika. U Minsku pryhoža vyjšli ź situacyi, pastaviŭšy premjeru na apoŭnač: u hałoŭnych staličnych kinateatrach pačatak pakazu byŭ u 23.57, 23.58, 23.59.
Niahledziačy na heta, na premjerny pakaz sabralisia sotni minčukoŭ. Na fota — čerhi ŭ «Dana mole». Paddalisia ažyjatažu i žurnalisty «Našaj Nivy»:)
Film, darečy, idzie bolš za try hadziny. U internecie navat publikavali śpis spojleraŭ, kali i na jakoj chvilinie budzie zručna vyjści ŭ prybiralniu. Bo ciarpieńnie treba kałasalnaje.
«Mściŭcy» buduć iści ŭ staličnych kinateatrach da 13 maja.
U «Mściŭcach: Finał» sabranyja ŭsie hieroi Marvel: i Čałaviek-pavuk, i Žalezny čałaviek, i Chałk, i Kapitan Amieryka, i Čałaviek-muraviej (jaho hraje biełarus z pachodžańnia Poł Rad (Rudnicki), i Tor, i Čornaja Udava, i Kapitan Marveł. Niezvyčajnaja kancentracyja supierhieroŭ na kvadratny mietr.
Jak napisaŭ kinakrytyk «Miaduzy» Anton Dolin, ažyjataž publiki napiaredadni premjery «Mściŭcy: Finał» — heta «najvyšejšaja pachvała dla miejnstrymnaha filma. Jak i toj fakt, što luby hladač, jaki vytrymaŭ hetyja try hadziny, u finale abaviazkova zapłakaŭ ślaźmi. Z vysokaj vierahodnaściu nie raz».
