Biełarusaŭ nazvali samaj nieemacyjnaj nacyjaj u śviecie
Amierykanski daśledčy centr Gallup apublikavaŭ śviežaje daśledavańnie z nahody emacyjnaści žycharoŭ krain śvietu. I biełarusy akazalisia samymi nieemacyjnymi, piša TUT.BY.
Pa dadzienych daśledavańnia, samymi emacyjnymi akazalisia žychary Nihiera, Filipin, Libieryi i Ekvadora. Im zadavali dziesiać pytańniaŭ z nahody emocyj, jakija jany adčuvali napiaredadni. U siarednim šeść ź dziesiaci žycharoŭ kožnaj z hetych krain raspaviali, što adčuvali stanoŭčyja abo admoŭnyja emocyi.
U Biełarusi, jak i ŭ Łatvii, i Azierbajdžanie, tak adkazali mienš za čatyry ź dziesiaci čałaviek. U vyniku pracent emacyjnaści varjiravaŭsia ad 60% u Nihiery, na Filipinach, Libieryi i Ekvadory da 34% u Biełarusi.
Ilustracyja: skrynšot z daśledavańnia Gallup Global Emotions. Na malunku Biełaruś biełaha koleru. Heta značyć, što ŭzrovień emacyjnaści ŭ nas — 34%.
U daśledavańni taksama analizujecca pazityŭny dośvied ludziej. Samymi niepazityŭnymi akazalisia žychary Afhanistana (uzrovień pazityvu 43), a samymi pazityŭnymi — Parahvaja i Panamy. Ich uzrovień — 85.
Ilustracyja: skrynšot z daśledavańnia Gallup Global Emotions. Čym kraina śviatlejšaja, tym mienš pazityvu adčuvajuć ludzi.
Śpiecyjalisty pryjšli da takich vysnovaŭ, apytaŭšy ludziej nakont taho, ci adčuvali jany zadavalnieńnie, ci adčuvali siabie adpačyłymi, uśmichalisia ci šmat śmiajalisia, adčuvali pavahu ŭ adnosinach da siabie za dzień da apytańnia. I kali pahladzieć na ilustracyju ŭ daśledavańni, jakaja pakazvaje ŭzrovień pazityvu, to Biełaruś, jak i Afhanistan, adznačana śvietłym koleram. Adnak u Afhanistanie spravy z pazityvam iduć jašče horš.
Taksama ludziej apytvali nakont niehatyŭnych emocyj. U ich ŭdakładniali, adčuvali jany niespakoj abo stres, sum abo hnieŭ. Čaściej za ŭsio ź niehatyŭnym dośviedam sutykalisia ŭ Čadzie (uzrovień indeksa niehatyvu dasiahnuŭ ličby 54) i mienš za ŭsio ŭ Tajvani (uzrovień niehatyvu — 14). Naprykład, u Kazachstanie ŭzrovień niehatyvu — 17, Polščy — 18, a Łatvii — 19.
Karcinka pakazvaje ŭzrovień niehatyvu. Čym śviatlejšaja kraina, tym jon mienšy. Ilustracyja: skrynšot daśledavańni Gallup Global Emotions. U Biełarusi ŭzrovień niehatyvu nievysoki, blizki da ŭzroŭniu Łatvii.
Vyniki apytańniaŭ zasnavanyja na telefonnych i asabistych sustrečach u 2018 hodzie. Z nahody pazityŭnaha dośviedu apytvali kala 1000 darosłych va ŭzroście ad 15 hadoŭ i starejšych na praciahu hoda ŭ 143 krainach, u płanie niehatyŭnaha vopytu — u 142 krainach.
