«Krama» zapisała novuju pieśniu paśla raskołu AŬDYJA
«Krama» prezentuje na TuzinFM pieśniu «Palicejski rok-n-roł», jakaja anansuje budučy novy albom kamandy Ihara Varaškieviča. Jana zapisanaja z novym hitarystam Andrejem Kraŭcevičam na słovy aŭtara pieršych albomaŭ hurta Ulis Feliksa Aksioncava.
«Palicejski rok-n-roł» faktyčna śviedčyć pra druhoje naradžeńnie «Kramy». Doŭhi čas u hurcie była niespryjalnaja atmasfera dla tvorčaści praź idejnyja razychodžańni Ihara Varaškieviča i Siarhieja Truchanoviča. Uvosień ich kanflikt vyjšaŭ na publiku. Siarhiej zajaviŭ, što nia bačyć bolš sensu pracavać z hurtom. Svaju krytyku ŭ adkaz vykazaŭ Ihar. U vyniku Truchanovič admoviŭsia vyjści na zajaŭleny ŭžo kancert i pastaviŭ kropku ŭ historyi z «Kramaju». Varaškievič dumaŭ skancentravacca na solnym prajekcie. Dalejšaje isnavańnie kamandy apynułasia pad pahrozaju…
Hurt «Krama» uzoru 2019 hodu.
Z synhłu «Palicejski rok-n-roł» pačynajecca novaja staronka ŭ historyi «Kramy». U hurt pryjšoŭ novy hitaryst — Andrej Kraŭcevič (jon byŭ zadziejničany ŭ takich hurtach i prajektach, jak The Stokes, Flammable, StereoTipy, Top Gun, Los Bulbas). Heta paŭpłyvała na hučańnie, źjavilisia novyja zadumy, aktyvizavałasia praca nad novym materyjałam.
Muzyku da «Palicejskaha rok-n-rołu» Ihar Varaškievič napisaŭ u 2017 hodzie ŭ chatniaj studyi Źmitra Dziamidava, saŭndpradusara, eks-hitarysta hurta Indiga. Pryčym sam prapisaŭ usie hitary, akramia basu. U jakaści vakalnaj partyi naśpiavaŭ słovy «na ptušynaj niamieckaj movie», jak kaža Ihar. U prypievie dema-zapisu hučali słovy «Fantaściš rok-n-roł». Ale paśla zaduma źmianiłasia, pieśniu było vyrašana nazvać «Aŭtazak». Kab stvaryć tekst na adpaviednuju tematyku Ihar źviarnuŭsia da Feliksa Aksioncava, hienijalnaha rok-paeta kanca 1980-ch-pačatku 1990-ch, aŭtara pieršych troch albomaŭ hurta «Ulis», jaki doŭhi čas užo žyvie ŭ Kanadzie. Feliks pahadziŭsia viarnucca ŭ biełaruskuju rok-prastoru i napisaŭ dla «Kramy» tekst z ulikam pažadańniaŭ Ihara. A słova «Aŭtazak», jakoje miełasia być u prypievie, prapanavaŭ zamianić na «Palicejski rok-n-roł» — «bo palicyja paŭsiul adnolkavaja».
«Naša ideja była ŭ tym, kab pahladzieć na niepryjemnuju temu z humarystyčnaha boku. Tak, jak heta robiać u kino. Stužka «Vialiki špacyr» z udziełam Łui de Fiunesa, naprykład, pra padziei druhoj suśvietnaj vajny. My taksama chočam pairanizavać z temy, jakaja padajecca zusim niaśmiešnaj», — tłumačyć Ihar.
Hetaj pieśniaj «Krama» anansuje svoj novy albom, praca nad jakim pačałasia.Žyvaja premjera «Palicejskaha rok-n-rołu» projdzie na bližejšym solnym kancercie 30 krasavika ŭ mienskaj kaviarni «Siabry». Na im hurt adnačyć 25-hodździe svajho albomu «Hej, tam, nalivaj». U supołcy «Tuzina» UKantakcie na dniach adbyłasia sieciŭnaja prezentacyja hetaha relizu, jaki vychodziŭ tolki na kasetach i daŭno staŭsia rarytetam.
