Top-5 krutych sajtaŭ ad biełaruskaj kamandy Pras. Siarod ich i «Naša Niva»
Minskaja kampanija ź biełaruskaj nazvaj PRAS raspracoŭvaje sajty i mabilnyja dadatki voś užo bolš za vosiem hod. Kamanda biarecca za składanyja, niezvyčajnyja i hłabalnyja zadačy, jak stvareńnie staronki dla achvotnych vyvučać štučny intelekt ci raspracoŭka sajta, što źmiaščaje źviestki pra tysiačy najvažniejšych muziejnych skarbaŭ. Sučasny sajt «Našaj Nivy», darečy, — taksama rabili prasaŭcy.
My raspytali dyrektara kampanii Mikałaja Tamaševiča i art-dyrektara Alaksieja Kulbickaha pra najbolš admietnyja anłajn-prajekty i servisy, stvoranyja PRAS.
Jak stvaryć sajt, kab jon palacieŭ
Vidać, samy kaśmičny (u pramym sensie) prajekt prasaŭcaŭ — staronka adnych ź pieršych kursaŭ pa mašynnym navučańni Tensor.by. Kali maksimalna prosta i koratka, to studentaŭ hetych kursaŭ vučać stvarać ałharytmy, zdolnyja navučacca. Inšymi słovami, studenty vučać robataŭ vučycca — raźvivajuć ich štučny intelekt.
Na kurs aby-kaho nie biaruć — tolki daśviedčanych prahramistaŭ. Prasaŭcam treba było stvaryć takuju staronku dla prajekta, kab pryjšli patrebnyja ludzi, hatovyja da novaha. Tamu jany i abrali kaśmičnuju tematyku.
Sajt hartajecca nie jak zvyčajna: skrolicie staronku ŭniz, a jana lacić uvierch. Pry kožnym prahortvańni idzie zvarotny adlik, niby pry zapusku kaśmičnaha karabla.
«Na kožnym novym etapie my adkazvajem na pytańni, jakija ŭźnikajuć u tych, chto vyrašaje, ci patrebnyja jamu hetyja kursy. I, jak vynik, karabiel narešcie lacić u kosmas», — raskazvaje pra zadumu Alaksiej.
«Naohuł, my lubim tłumačyć usio na palcach, heta papularny ciapier u Amierycy i Zachodniaj Jeŭropie pryncyp storytelinhu», — dadaje Mikałaj.
Što rabić, kali ŭ adnym prajekcie metavych aŭdytoryj bolš za dźvie
Voźmiem Dziaržaŭny katałoh Muziejnaha fondu — tak jon nazyvajecca aficyjna. Tam, biezumoŭna, jość i muziei, ale asnoŭnaje — muziejnyja abjekty.
«Hety sajt musić być karysnym jak admysłoŭcam u muziejnaj halinie, tak i tym, kamu prosta cikava, jakija artefakty zachoŭvajucca ŭ muziejach Biełarusi», — raskazvajuć kiraŭniki PRAS, jakija ŭzialisia stvaryć taki hłabalny anłajn-kufar.
Siońnia ŭ katałoh dadadziena ŭžo 200 tysiač abjektaŭ, tolki 2 700 dastupnyja dla ŭsich. Astatnija schavanyja ad šyrokaj hramadskaści, ale ź imi mohuć pracavać admysłoŭcy.
Heta — tolki pačatak vialikaj pracy, bo pastupova napaŭniajecca i sajt dziaržaŭnaha rejestra knižnych pomnikaŭ. Kali jon zapracuje napoŭnicu, kožny achvotny zmoža padrabiazna razhladzieć u vydatnaj jakaści drukavanyja vydańni, jakija možna adnieści da knižnych pomnikaŭ: i Skarynaŭskija staradruki, i rośpis Radziviła ź jaho kalekcyi.
U 2016 hodzie kamanda PRAS vykanała maštabnuju zadaču dla Nacyjanalnaha ahienctva pa turyźmie: stvaryła sajt i raźmiaściła jaho na šaści roznych paddamienach. Na kožnym — svaja moŭnaja viersija: biełaruskaja, ruskaja, anhlijskaja, kitajskaja, niamieckaja i polskaja.
{NEWS}
«Usie hetyja sajty mohuć vyhladać absalutna pa-roznamu, ale administrujucca jany z adnaho miesca, — kaža Mikałaj Tamaševič. — U anhłamoŭnaj viersii, naprykład, padkreślivajecca, što ŭ Biełaruś možna pryjechać bieź vizy. A ŭ kitajskamoŭnaj padrabiazna raspaviadajecca pra savieckaje minułaje Biełarusi, bo akurat heta im cikava. Darečy, my prapanoŭvali ŭ miežach prajekta dzialić Biełaruś nie administracyjna, a pa tradycyjnych rehijonach: Paniamońnie, Padniaproŭje, Paleśsie. Ale zamoŭcy vyrašyli ŭsio ž pakinuć administracyjny padzieł».
«Choć heta vielmi niazručna dla inšaziemcaŭ, bo praz toje, što, naprykład, Mirski i Niaśvižski zamki znachodziacca ŭ roznych abłaściach, inšaziemiec moža prosta nie zrazumieć, što znachodziŭsia pobač», — dadaje Alaksiej.
Pracujuć u PRAS nie tolki ź biełaruskimi zamoŭcami, ale i z zamiežnymi kampanijami.
«Šviejcarskaja arhanizacyja, što zamoviła ŭ nas sajt, pryśviečany prablemam biežancaŭ, sačyła za našaj pracaj piać hod, pierš čym źviarnucca, — raskazvaje Mikałaj. — Hety prajekt ź vialikim funkcyjanałam — naš honar. Mała chto robić padobnyja sajty za tyja hrošy, za jakija robim my».
Sajt Inkluso (ciapier jon na stadyi testavańnia i zapusku) — heta faktyčna sacyjalnaja sietka, u Šviejcaryi jaje nazyvajuć «płatformaj dla sacyjalnaj inkluzii». Stvoranaja jana dla palapšeńnia intehracyi biežancaŭ u šviejcarskaje hramadstva.
Płatforma dazvalaje znajomicca, dapamahać adno adnamu (naprykład, šviejcarcy mohuć dapamahčy z afarmleńniem niejkich dakumientaŭ, a biežancy — z vyvučeńniem arabskaj movy). Akramia taho, na płatformie možna šukać žyllo i pracu.
Padobnaha partała ŭ Šviejcaryi jašče nie było. Isnavali sajty dla znajomstvaŭ, byli śpiecyjalizavanyja sajty dla žylla. Ale kab usio razam i dla vuzkaj aŭdytoryi — to nie.
Čaho zamiežnyja zamoŭcy čakajuć ad biełarusaŭ
Šviejcaryja — nie adzinaja kraina, ź jakoj paśpieli pasupracoŭničać prasaŭcy. Źviartalisia zamoŭcy sa Šviecyi, Litvy, Kanady, Polščy, Rasii.
«Adno možam skazać dakładna: nijakija pieramohi ŭ konkursach, udzieły ŭ vystavach na zamovy nie ŭpłyvajuć. Pracujuć tolki rekamiendacyi», — zapeŭnivaje Alaksiej.
Zvyčajna bujnyja prajekty raspracoŭvajucca na praciahu hoda. Ciapier PRAS paralelna pracuje nad dziasiatkam vialikich zamoŭ.
«Pačynajem ź biznes-analizu, vyvučajem klijenta i vyśviatlajem jaho čakańni. Zatym adsočvajem, što robiać u hetaj halinie kankurenty, hladzim na suśvietnyja trendy, praličvajem usie mahčymyja ryzyki», — tłumačyć schiemu padrychtoŭčaj pracy Mikałaj.
«Paśla raspracoŭvajem techzadańnie, raźbivajem rabotu na etapy. Stvarajem pratatyp, prykładnuju schiemu, jak budzie vyhladać struktura budučaj staronki», — praciahvaje Alaksiej.
U PRAS kamanda prahramistaŭ padabranaja tak, kab možna było vykanać praktyčna lubuju zadaču. Pakolki sajty pieravažna stvarajucca z nula — heta vielmi važna.
«Nam niecikava pracavać pa hatovych šabłonach, tamu naŭrad ci my voźmiemsia rabić typovy sajt dla internet-kramy, naprykład. Dy i jany da nas chutčej za ŭsio nie pojduć», — dadaje Alaksiej.
Jość prajekty, jakija prasaŭcy robiać, što nazyvajecca, dla dušy. Uziać tyja ž sajty «Žele Biełaruś!» ci «Vyšyšyna».
Darečy, z-pad ruk dyzajnieraŭ studyi PRAS vyjšli hulnia «1514» i biełaruska-litvinskija šachmaty. Akurat tyja rečy, u pracy nad jakimi kamanda prosta adpačyvaje i atrymlivaje asałodu.
Nie možam nie adznačyć, što mienavita prasaŭcy pracavali nad dyzajnam partała NN.by i jaho mabilnaj viersijaj, a taksama nad našym prajektam Nina.nn.by.
««Naša Niva» — sajt nie chipstarski. U im niama pryhožych karcinak nie pa temie, tamu na jaho i chočacca viartacca. Ty bačyš, što hałoŭnaje — chutkaść reahavańnia i čyścinia infarmacyi, a nie štučny estetyzm padabranych malunkaŭ», — tłumačać kiraŭniki PRAS, na što aryjentavalisia ŭ raspracoŭcy dyzajnu partała NN.by.
A vam padabajecca?
