Ci praŭda darahaja karejskaja kaśmietyka cudadziejnaja? Paraŭnali ź biełaruskimi anałahami
Karejskija kremy i maski dla tvaru stali nastolki papularnyja, što pradajucca ledź nie ŭ kožnaj kaśmietyčnaj kramie. Kaštujuć niatanna, ale nakolki jany efiektyŭnyja? My prapanavali kaśmietołahu ŭślapuju paraŭnać składy piaci azijackich srodkaŭ i ich tannych biełaruskich anałahaŭ. Spojler: niekatoryja vyniki akazalisia niečakanymi.
Pilinh-skatka
Biełaruski varyjant — 3,41 rub. (75 mł), karejski — 31 rub. (150 mł).
— Jon pracuje jak miakki skrab. Zdymaje pavierchnievy epidermis, jaki ŭžo pamior, ale pa niejkich pryčynach nie złupiŭsia. Taki pilinh my rekamiendujem piaščotnym tonkim skuram, jakija nie chočam traŭmiravać vostrym abrazivam, — tłumačyć doktar-kaśmietołah, dermatołah pieršaj kvalifikacyjnaj katehoryi centra «Skinluks» Žanna Kudzina.
Kaśmietołah Žanna Kudzina.
U biełaruskim srodku śpiecyjalist adrazu źviartaje ŭvahu na vialikuju kolkaść sintetyčnych składnikaŭ: heta moža vyklikać alerhiju. Šmat PEG — hety kampanient dadajuć dla ŭvilhatnieńnia skury i pradaŭžeńnia terminaŭ prydatnaści kaśmietyki, ale jon moža pranikać unutr i nakaplivacca ŭ nyrkach. Tamu nasić takuju kaśmietyku pastajanna niepažadana. Tym bolš u składzie jość dymietykon (ci silikon), jaki pry rehularnym vykarystańni nie daje skury dychać i paharšaje jaje stan.
Z naturalnych kampanientaŭ — cynk i pantenoł. Pieršy padsušvaje, druhi — uvilhatniaje. Nie zrazumieła, dla jakoha typu skury padydzie taki pilinh.
Karejski varyjant kaśmietołahu padabajecca bolš.
— Tut u vialikaj kolkaści znachodzicca hliceryn, jaki patrebny dla ŭvilhatnieńnia, dobraje ŭtrymańnie naturalnych kampanientaŭ. Ź niehatyŭnaha — taksama jość PEG i izaprapiłavy śpirt. Apošni moža vyklikać alerhičnyja reakcyi i nie vielmi dobry dla ciažarnych, bo moža pranikać u tkanki płoda. Ale tut hetyja kampanienty ŭ kancy śpisu.
Ačyščalnaja maska z vuhlom
Biełaruski varyjant — 2,08 rub. (75 mł), karejski — 36 rub. (100 h).
Takija maski pryznačany, kab sarbiravać skuranoje sała i taksiny: jany, jak hubka, ubirajuć u siabie liški. Skura stanovicca bolš aksamitnaj. Dobry varyjant dla tych, u kaho narmalnaja ci kambinaravanaja skura, jość schilnaść da vysypańniaŭ. A voś suchaja skura horš pieranosić taki skład.
— Pieršy varyjant pačynajecca z PEG. Heta viečny preparat, jaki možna zachoŭvać u vannaj i nie bajacca, što tam zaviaducca mikraarhanizmy: im niama čym pažyvicca, — žartuje kaśmietołah. — Šmat addušak, stabilizataraŭ i kansiervantaŭ. Nievialikuju kolkaść naturalnych kampanientaŭ bačym tolki ŭ kancy śpisu.
I zadajemsia pytańniem: a dzie ž vuhal? Ja nie znajšła. Heta maska bolš padsušvaje, čym sarbiruje.
U karejskaj mascy taksama chapaje škodnych kampanientaŭ. Ale ŭ składzie adrazu paśla vady stajać bietain i kaalin — sarbienty, jakija i dajuć efiekt hubki. Tamu heta maska budzie bolš dziejsnaja. Plus u joj utrymlivajucca ekstrakty łavandy, ramonka i razmarynu (jany supakojvajuć razdražnionuju skuru) i kałahien ź bientanitam (dadatkova ŭvilhatniajuć).
Krem z mucynam smaŭža
Karejski varyjant — 31,90 rub (50 h), biełaruski — 9,27 (50 mł).
Karejski krem rasčaravaŭ: razrekłamavanaha ekstraktu ŭ im amal niama. A ŭ biełaruskim anałahu cuda-inhredyjentu nie paškadavali — jon na treciaj pazicyi.
— Ja jak spažyviec chaču smaŭža i płaču za jaho, a nie za niezrazumiełyja kansiervanty i masła, — kaža Žanna Kudzina. — U hetym kremie, kaniečnie, šmat stabilizataraŭ, ale z ulikam taho, što tut šmat ślizi, napeŭna, heta apraŭdana, kab jaje zachavać. Hałasuju za druhi varyjant.
Aśviatlalny krem
Karejski varyjant — 35 rub. (50 h), biełaruski — 3,58 rub (50 mł).
Kab krem aśviatlaŭ pihmientnyja plamy, u im pavinny być kisłoty. Jany jość i ŭ karejskim, i ŭ biełaruskim srodku.
Ale ŭ kožnym ź ich kaśmietołah znachodzić niedachopy. U pieršym — značnaja kolkaść PEG i śpirtoŭ. U druhim, akramia śpirtoŭ, jość aksidy aluminiju: u Jeŭropie preparaty ź imi zabaraniajuć, pakolki jany mohuć pravakavać raźvićcio raku małočnaj załozy. Plus u składzie silikon, jaki, nahadajem, nie daje skury dychać, — jon robić skuru aksamitnaj tolki pakul na joj lažyć.
— Tut składana vybrać. Mnie ni adzin, ni druhi nie padabajecca pa svaim składzie. Ale ŭ pieršym choć jość masła šy, jakoje ŭvilhatniaje. Napeŭna, ź vialikaj naciažkaj ja b addała pieravahu hetamu srodku, — kaža ekśpiertka pra karejski krem.
Patčy pad vočy ź liftynh efiektam
Kitajski varyjant, jaki ŭ kramie vydali za karejski, — 3,50 rub., biełaruski — 1,50 rub.
— Pieršy varyjant ja b kupiła. Na pieršych miescach — hliceryn, kałahien, jakija dobra ŭvilhatniajuć. Plus tut jość hiałuronavaja kisłata. Bolš prosty i naturalny skład, — kamientuje Žanna Kudzina.
Paru słoŭ pra hiałuronavuju kisłatu: jana kładziecca na skuru plonačkaj i ciahnie vadu z hłybokich słajoŭ u pavierchnievyja, tym samym ich uvilhatniaje. Ale heta biessensoŭna, kali vy pjacie niedastatkova vady ci časta siadzicie pad kandycyjanieram.
U biełaruskich patčach jość bisabałoł (likviduje ciomnyja kruhi pad vačyma) i ekstrakt arniki (palapšaje krovazvarot). Uvilhatnieńnie tut dasiahajecca za košt mačaviny. «Choć pad vočy mnie b nie vielmi hety kampanient chaciełasia», — uśmichajecca kaśmietołah.
Što majem? Azijackija patčy adnaznačna lepš spraviacca ź liftynham. Biełaruskija takoha efiektu nie daduć. Zatoje dapamohuć prybrać ciomnyja kruhi, miaški i aciočnaść pad vačyma.
Kab rastavić kropki nad «i»: usie kansiervanty i stabilizatary, jakija my ŭbačyli ŭ kaśmietycy, dapuščany da vytvorčaści.
«Jany prymianiajucca navat u luksavych markach. Ale pa mahčymaści lepš admaŭlacca ad sintetyčnych kampanientaŭ na karyść naturalnych», — raić Žanna Kudzina.