Andrej Bandarenka vyjhraŭ sud va ŭłaśnika «BiełHaziety» Kiryła Žyvałoviča
Pravaabaronca Andrej Bandarenka, jaki pretendavaŭ na pasadu dyrektara «BiełHaziety», vyjhraŭ sud u asnoŭnaha ŭłaśnika hetaha vydańnia Kiryła Žyvałoviča. Bandarenka dakazvaŭ, što słovy «afieryst», «prajdziśviet» i «machlar», jakimi jaho nazyvaŭ Žyvałovič, nie adpaviadajuć rečaisnaści i źnievažajuć jaho honar, hodnaść i dziełavuju reputacyju. Žyvałovič z hetym nie pahadžaŭsia, paviedamlaje Jeŭraradyjo.
Vykazvańni, pra jakija idzie havorka byli apublikavanyja na asabistaj staroncy ŭłaśnika «BiełHaziety» ŭ Facebook, na sajtach Jeŭraradyjo i «Biełaruski partyzan», a taksama ahučanyja ŭ efiry telekanała «Biełsat». Akramia abviaržeńnia, pravaabaronca patrabavaŭ kampiensacyju za maralnuju škodu — 40 tysiač rubloŭ.
Sud častkova zadavoliŭ patrabavańni Andreja Bandarenki. Sudździa Zinaida Krasoŭskaja vyrašyła, što Kirył Žyvałovič musić abvierhnuć frazy sa słovami «afieryst», «prajdziśviet» i «machlar», jakija jana pryznała nie adpaviednymi rečaisnaści i źnievažajučymi honar, hodnaść i dziełavuju reputacyju Bandarenki. Taksama Žyvałovič musić zapłacić Bandarenku 500 rubloŭ kampiensacyi za naniesienuju maralnuju škodu.
