Pad Minskam zatrymany złodziej-hastralor z Danbasa, jaki kraŭ vielmi niezvyčajnym sposabam
U žyllo jon pranikaŭ asablivym sposabam — prapalvaŭ adtulinu ŭ stvorcy škłopakieta, paviedamili Źviaździe ŭ abłasnoj milicyi.
Pieršaje paviedamleńnie ab kradziažy, jaki ździejśniŭ mierkavany złamyśnik, pastupiła ŭ dziažurnuju častku Minskaha RUUS 1 listapada minułaha hoda. Žychar Zasłaŭja patłumačyŭ, što nieviadomaja asoba, nočču ŭskryŭšy škłopakiet, pranikła ŭ žyllo i vykrała 1500 rubloŭ, dva mužčynskija i adzin žanočy hadzińniki, a taksama juvielirnyja vyraby na ahulnuju sumu bolš za 5000 rubloŭ.
Ź miesca złačynstva byŭ kanfiskavany zapis videanazirańnia, dzie było vidać, što złačynstva ździejśniŭ adzin čałaviek. Supracoŭniki kryminalnaha vyšuku Minskaha RUUS źviarnuli ŭvahu na asablivy sposab praniknieńnia ŭ žyllo — šlacham prapalvańnia adtuliny ŭ stvorcy škłopakieta. Takich vypadkaŭ na terytoryi Biełarusi raniej nie było.
Druhi padobny vypadak adbyŭsia ŭ Kałodziščach. 12 listapada znoŭ ža minułaha hoda ŭ apieratyŭna-dziažurnuju słužbu źviarnułasia miascovaja žycharka. Jana kala 4 hadzin ranicy pačuła kroki ŭ domie, a, padniaŭšysia pahladzieć, u čym sprava, ubačyła siłuet mužčyny, što vyłaziŭ u akno. U domie ničoha nie było skradziena, adnak sposab praniknieńnia ŭ žyllo byŭ anałahičnym z vypadkam u Zasłaŭi.
Nastupny taki vypadak praniknieńnia ŭ žyllo adbyŭsia ŭ Tarasava. 24 listapada ŭ načny čas nieviadomy pasprabavaŭ patrapić u dom, adnak jamu hetaha zrabić nie ŭdałosia. Pa śladach, pakinutym na stvorcy škłopakieta, apieratyŭniki vykazali zdahadku, što i tut «papracavaŭ» toj ža čałaviek, što i ŭ papiarednich vypadkach.
Apošni anałahičny fakt byŭ zafiksavany ŭ ahraharadku Ratamka. Jak i ŭ papiarednich złačynstvach, padziei raźvivalisia ŭ načny čas. Tut złačyncu znoŭ paščaściła: z domu byli vykradzienyja 200 dołaraŭ, 50 jeŭra, 100 rubloŭ, a taksama pradukty charčavańnia (banany i plitka šakaładu).
Pry adpracoŭcy adnaho z sadovych tavarystvaŭ na terytoryi Minskaha rajona na adnym z dačnych učastkaŭ byli zaŭvažany ślady pražyvańnia, choć dla adkryćcia dačnaha siezonu było davoli rana. Kali apieratyŭniki padychodzili da doma, kab daviedacca, chto tam žyvie, z žylla vyskačyŭ mužčyna i kinuŭsia ŭ bok lesu ŭ nadziei schavacca. Apieratyŭniki zatrymali ŭciekača.
U chodzie asabistaha vobysku ŭ mužčyny była vyjaŭlena majomaść, jakaja jamu nie naležała, a taksama prystasavańni, jakija mahli być vykarystany dla prapalvańnie i ŭskryćcia škłopakietaŭ, a taksama hadzińniki, anałahičnyja vykradzienym u Zasłaŭi. Zatrymany admaŭlaŭ svajo dačynieńnie da złačynstvaŭ i rastłumačyŭ, što nabyŭ chranomietry na «barachołcy» za 10 rubloŭ. Adnak śpiecyjalist paćvierdziŭ sapraŭdnaść hadzińnikaŭ, heta značyć, jany byli aryhinalnymi.
U chodzie dalejšych apieratyŭnych mierapryjemstvaŭ, śledčych dziejańniaŭ i ekśpiertnych daśledavańniaŭ była ŭstanoŭlena datyčnaść zatrymanaha da nazvanych vyšej i inšych dačnych kradziažoŭ, usiaho bolš za dziesiaci złačynstvaŭ.
Što ž tyčycca asoby złačyncy, im akazaŭsia 53-hadovy ŭradženiec Danieckaj vobłaści, jaki raniej mieŭ sudzimaść na terytoryi Rasijskaj Fiederacyi za ździajśnieńnie kvaternych kradziažoŭ.
