Što vy nie razumiejecie i baiciesia zapytacca ab palitkarektnaści, tamplijerach i štučnym intelekcie na prykładzie Paryžskaj Matki Boskaj
Dadzieny list nosić pravakacyjny charaktar. Pierad tym, jak čytać, parajciesia sa svaim doktaram, a taksama aznajomciesia z Druhim pasłańniem da karynfianaŭ.
Zhareŭ sabor. Pryhožy šedeŭr jeŭrapiejskaj hotyki. Z harhuljami, chimierami, śviatym Dyjanisijem i Kvazimodam. Škada, viadoma. Ale što zrobiš? Sic transit Gloria mundi (hetak prachodzić słava ludskaja) za 15 chvilin žyvoha efiru. Sponsar pakazu: la révolution est en marche (revalucyja praciahvajecca). Ekałahična čystaja, palitkarektnaja, biez HMA, ź bifidabakteryjami i naturalnymi ionami srebra.
Adrazu Saŭki dy Hryški zajhrali ŭ dudku: heta krach biełaj cyvilizacyi, heta 9/11 dla Jeŭropy i inšyja tehi, jakija tak prosta lapić, hledziačy na sakavityja kadry. Dziakuj vam, kulturtrehiery druhoha adciskańnia z dabaŭleńniem kukuruznaha siropu dy mahčymymi śladami arachisu! Zaŭtra zapalenyja padobnymi razvažańniami pikiejnych kamizelek paru kamizelek žoŭtych apracujuć paru sudancaŭ, ich apracuje palicyja… I my znoŭ praciahvajem žyvy efir! Košt rekłamnaj chviliny raście kožnuju siekundu. Tvitar ananimnaha filipinskaha trola cytuje «Frans pres» i «Błumbierh». Profit!
Samy vialiki sakret našaj cyvilizacyi vam užo razžavali ŭsie ad apostała Paŭła da aŭtaraŭ mulcika «Saŭs Park»: heta adno ŭsialenskaje šou. Vy sami — kantent i spažyviec, pasłańnik i samo pasłańnie. Uraboras, jaki płacić za spažyvańnie ŭłasnaha chvasta. Vy jaścio, što dajacie. I anijak inakš. I tolki ŭładalniki kanałaŭ dystrybucyi — nie važna, u staražytnym Rymie, u revalucyjnaj Francyi ci ŭ Kremnijevaj dalinie, jak zaraz, — robiać na hetym hiešeft.
Bo vy sami hetaha chočacie. Voś da hetaha kankretnaha fakta ź jakoha boku ni padydzi. Možna ab prablemach pažarnaj biaśpieki, sa statystykaju pažaraŭ. Možna ab tym, jak papularny ŭ francuzskich kołach trackizm źmiašaŭsia z antyrelihijnym radykalizmam dy fieminizmam. Ci pieraličyć akty carkoŭnaha vandalizmu ŭ francuzskich rehijonach za apošnija 20 hadoŭ, kapijavańni złačynnych aktaŭ, papularnyja pracy ab simulacyi zmahańnia z paternalisckim ducham ancien régime, psichijatryčny analiz defiekacyi i ikanaborstva… bła-bła-bła…Heta ž niecikava! Sucha, analityčna. Emocyj niama. Usie razyšlisia klikać Łabadu ci teoryi ab tym, chto ž taki Karol Nočy.
Vam ža miasa treba! Heta jany (ustaŭcie svoj ułasny teh) źniščyli našaje! Prytym što da Notr-Dama z mapidaŭskaj panelki hetak ža daloka, jak kałodziežnamu žabianiaci da hłybini mora. Ale ž ciahnie tudy, razvažać na hałaktyčnyja temy. Tam, dzie dazvalajuć plaskać tolki adnoj dałońniu, raptam kožny ŭjaŭlaje siabie batchisatvaju. Ale ž zmahacca za svaje ŭłasnyja kryžy nie dazvalaje analna-vyciskajučy impuls imia Čapajeva. Možna ž i pa «śviatym» miescy atrymać, i mima čarhovaj premii pralacieć. A tut takaja mahčymaść adarvacca i pakazać svaju miehaerudycyju.
Dyk ja vam dapamahu zrabić pieršy krok na toj darozie ŭ tysiačy li (važna: 里 = 571.5 m!). Što vy rabili, kali stajaŭ Majdan? Spračalisia, chto tut amierykanski hrantasmok, a chto kramloŭski trol. A niechta «šorciŭ» (pradavaŭ z raźlikam na źnižeńnie koštu) usiu Rasiju, što moh. Što vy rabili, kali byŭ Breksit? Spračalisia: chto — ahient kryvavaj hebni, a chto — paskudny lavak. A niechta «šorciŭ» usiu Brytaniju, što moh. U tym liku aŭtary hetaha Breksitu, infa 100%. Tramp zakryŭ kitajcam soju? Dušy soju. 30 miljonaŭ ton zhnili — i čort ź imi. Chto chacieŭ — zarabiŭ. Naš śviet — heta sprava (anhł. biznes), jak by vam ni chaciełasia bolš vysokaha palotu.
Druhi krok jašče praściejšy. Pa Hiehielu. Kab stvaryć momant dla taho, kab zarabić hrošy, treba stvaryć supierpazicyju — adzinstva i baraćbu supraćlehłaściej. Breksit i adziny rynak, Tramp i Ilchan Amar, fakielnyja šeści i karavany mihrantaŭ, jaŭrei i ravarysty. Hałoŭnaje, kab emocyi vyharali. Niby napałm.
Kali vy zrazumieli krok pieršy i druhi, vy možacie zrabić krok treci: znajści sabie płyń i kidać u jaje kamieńčyki. Ad ich pa vadzie buduć iści kruhi. Ale ad płyni jany buduć chutka źnikać. Ludzi buduć pytacca: a što heta značyć? A vy kidajcie jašče kamieńčyk, kab jany zabylisia pra pieršy. Chutka źjaviacca tyja, chto pačnie tłumačyć, jak heta takoje moža być. I tyja, chto pačnie tłumačyć pieršych. A vy tolki kidajecie kamieńčyk za kamieńčykam. Hetak vy možacie, pavodle zapavietu Nicše, viečna viartać ludziej da svajho chvasta. Za ich ža hrošy!
Mienavita hetak pracuje ŭsia sučasnaja ličbavaja ekanomika. Mnohija, chto ŭ joj zaniaty, navat nie vielmi heta razumiejuć. Ale kali ty dobra zarablaješ — jakaja roźnica? Tańčy, pakul iduć kruhi emocyj pa biaskoncaj płyni navin. Navat niekatoryja miljardery błytajuć karelacyju (uzajemasuviaź źjavaŭ) i kaŭzacyju (pryčynnuju suviaź). Nie kažu ŭžo pra tych krysałovaŭ, što zamańvajuć dudkami na svaje lekcyi i sieminary. Jany vam kidajuć kamieńčyki intuityŭna. Niachaj sabie tearemu Bajesa nie viedajuć, a zarablajuć bolej za vas, školnych vydatnikaŭ.
Tramp, Breksit, «suvierennaja demakratyja», rasstreły na Filipinach pry dapamozie analityčnaha manitorynhu vulic ad IBM — heta reakcyja. Na toje, što śviet staŭ adnoj vialikaj vioskaju, dzie ad Kim Kardašjan iduć bolšyja kruhi, čym ad iranskaj jadziernaj prahramy. Na toje, što hramadstva bolš nie viertykalnaje, što ŭłada nad ludźmi bolš nie pramoje dziejańnie. Adnamu pamirać strašna — taki ŭžo evalucyjny miechanizm, tamu reakcyjaniery zaŭždy chočuć brackuju mahiłu. Razam u raj.
U chutkaj budučyni nie bahatyja krainy buduć budavać ścieny ad mihrantaŭ, jak by tam ni vyli reakcyjnyja palityki, a naadvarot — biednyja satrapii buduć zaŭziata adstrelvać tych, chto źbiahaje ŭ kazačnyja vyspy adkrytaha hramadstva. Bahatyja hramadstvy iduć da śvietłaha ličbavaha tatalitaryzmu kožnaha hramadzianina (skandynaŭskaja madel, pieraraźmierkavańnie dziela maksimizacyi dabrabytu kožnaha), biednyja — da ličbavaha tatalitaryzmu partyi i ŭrada (kantrol nad usimi resursami, pieraraźmierkavańnie dziela maksimizacyi prybytku kiroŭčaha palityčnaha kłasa). Vam zastajecca vybrać, dzie i ŭ roli kaho buduć vašyja dzieci. Tamu što, kali skončycca aktualnaść nafty i vuhalu, satrapii pahoniać dzietak harmatnym miasam na bajavyja drony praciŭnika. Vojny budučyni buduć nie za pitnuju vadu ci vornuju ziamlu, a za mahčymaść stvarać ci nie stvarać umovy dla dabrabytu kožnaha.
Heta ŭ XX stahodździ padavałasia, što vialiki brat, jaki siadzić kłoŭnam jak ciomnaje «jano» ŭ kožnym z nas, budzie prymušać ludziej žerci narkotyk ščaścia. Ab hetym vašyja Zamiaciny, Orueły, Chakśli i h.d. Na samaj spravie, ludzi sami lohka mianiajuć svabodu na kamfort. U adzin klik. Dajcie im apošniaje — i im nie patrebna pieršaje. U hetym uvieś fokus, biez 300 staronak dynamičnaje prozy. Tamu zastajecca dapamahać čałavieku bavić čas, dapamahać emacyjna vyharać. Tolki dla hetaha zaraz i pracujuć prostyja matematyčnyja ałharytmy, jakija šamany abvieścili «štučnym intelektam», kab nie dać «im» źjavicca zamiest vas. Voś jak u apošnim filmie Džordana Piła.
Pakinuty sam-nasam z sučasnaściu čałaviek zvarjacieje ad adkaznaści i pojdzie stralać susiedziaŭ. Ci valić kryžy i palić cerkvy. Heta taksama reakcyja ci partyzanskaje dziejańnie. Tolki na mikraŭzroŭni. Dyktatar maje palicyju, sistemu manitorynhu i suvorych ludziej ŭ tryko na matacykłach, a adzinoki psichapat dziejničaje sam, nabyŭšy tuzin aŭtamatyčnych vintovak praz Uoł-Mart pa kartačcy «Amierykan Ekspres». Tamu, Aleksa i Siry, nie daj jamu zasumavać.
Kab nie zabycca pra amataraŭ teoryj zmovy. Notr-Dam byŭ Łobnym miescam. Tam šmat kaho zabili za stahodździ. Voś vam enierhietyka, šanoŭnyja turysty! Naprykład, tam byli spaleny žyŭcom de Male, de Šarne, de Piero i Hanevil — lidary ordena tamplijeraŭ. Pa lehiendzie, de Male praklaŭ pierad śmierciu karala Francyi i Papu, a tyja sabie pamierli ŭ toj ža samy hod. Trochsothadovaja dynastyja padaviłasia zołatam rycaraŭ i skončyłasia. Dobry sieryjał? Chiba što biez cmokaŭ. Našy prodki hetaksama lubili šou. Nie važna, čyje mienavita hałovy kociacca ŭ žyvym efiry. Važna tolki, što nie vašaja.
Našyja zašklaniełyja kansiervatary štodnia čakajuć kaniec Jeŭropy. Maŭlaŭ, kali niama nas u jeŭrapiejskaj siamji, niachaj i jana sama padochnie. Taki voś sieryjał. Pryhody Špienhlera, albo Za «dahonam» pa Malinaŭcy. Enjoy (atrymlivajcie asałodu)!
A sabor adbudujuć. Jak adbudavali sotni saboraŭ apaśla Pieršaj i Druhoj suśvietnaj. Ci voś pamiatajecie zvanicu śviatoha Marka ŭ Vieniecyi? Jana razvaliłasia biez usialakaje vajny. 120 hod tamu. Ale ž adbudvali — i vy fotkajecie. Ničoha epična strašnaha nie adbyłosia.
Miljardam ludziej navokał spravy niama da vašaha štochvilinnaha akta simvaličnaj śmierci judziea-chryścijanskaj cyvilizacyi. Tolki skončyŭsia viasieńni ŭradžaj i nadyšoŭ novy hod. Usie častujuć adzin adnaho, śpiavajuć pieśni da ranku, stałyja dajuć srebny hroš maładym na ŭdaču. A tyja rychtujuć płuhi da novaha siezonu. Chutka ŭžo źmienicca viecier i pačnucca musony. Naš śviet — heta sprava.
