Biełarusy na MAZie prajšli pieršy etap rali Morocco Desert Challenge
Kamanda «MAZ-SPORTaŭta» prajechała pieršy etap rali-rejdu Morocco Desert Challenge, paviedamili BiełTA ŭ pres-słužbie AAT «MAZ».
U pieršy dzień honščyki pieraadoleli śpiecučastak daŭžynioj 216 km. Novy kapotny MAZ, jaki ŭpieršyniu ŭdzielničaje ŭ spabornictvach takoha vysokaha ŭzroŭniu, amal adrazu vyrvaŭsia napierad i niejki čas išoŭ pieršym siarod hruzavikoŭ. Ale z-za drennaj bačnaści biełaruskija honščyki źbilisia sa šlachu, zabłytaŭšysia ŭ navihacyi.
U vyniku Siarhiej Viazovič pakazaŭ 15-y čas - 3 hadziny 14 min. Pieramožcam zajezdu staŭ Marcin van den Brynk na Renault, jaki pryjechaŭ raniej na 27 chvilin. MAZ Alaksieja Višnieŭskaha finišavaŭ na 16-m miescy, adstaŭšy ad partniora pa kamandzie na 2 chviliny.
«Dla nas dzień skłaŭsia dobra. Bolšuju častku trasy my lidziravali, ale kali vyjšli na pieršuju pazicyju, dahnali adrazu šeść džypaŭ, jakija jechali ŭ pyle adzin za adnym. Viecier byŭ spadarožny, pył išoŭ razam z nami. U niejki momant pamylilisia ŭ navihacyi i syšli ŭ bok: patracili kala paŭhadziny, kab znajści maršrut i viarnucca na trasu. Zatoje nijakich prablem z mašynaj nie ŭźnikała. Kapotnik pryjemna pavodzić siabie na darozie. Pa adčuvańniach možam jechać chutčej, ale pakul pryvykajem», - raspavioŭ lidar biełaruskaj kamandy Siarhiej Viazovič.
Na druhim etapie ekipažy čakaje śpiecučastak daŭžynioj 402 km. Bolšaja častka šlachu projdzie pa pustyni Sachara, ale budzie šmat i chutkasnych adrezkaŭ.
Rali-rejd Morocco Desert Challenge prachodzić u Maroka 12—20 krasavika. Bolšaja častka trasy pralahaje pa pustyni i piasčanaj miascovaści, a siarod pieraškod - vydmy, zybučyja «fieš-fieš» i vysachłyja rečyščy rek. Maršrut honki składaje 2741 km i padzieleny na 8 etapaŭ.
