Jak uzłomvajuć Telegram z dvuchfaktarnaj aŭtaryzacyjaj i jak hetaha paźbiehnuć — PARADY admysłoŭca
U aktyŭnych siesijach Telegram pačali źjaŭlacca znački inšych pryład. Što adbyvajecca? Ničoha novaha — zvyčajny ŭzłom.
Isnuje mierkavańnie, što Telegram-pierapisku nie ŭzłomvajuć, jana nie moža być pračytana pravaachoŭnymi orhanami, a ŭładalnik Telegram-akaŭnta nie moža być identyfikavany.
Siarod advakataŭ isnuje pamyłkovaje mierkavańnie, što pierapiska ŭ miesiendžarach, u tym liku i ŭ Telegram, nie moža być dałučana da kryminalnaj spravy, tamu što składana dakazać, chto mienavita pierapisvaŭsia z taho ci inšaha akaŭnta ŭ peŭny momant.
Dakazać heta składana, ale pry pravilnym padychodzie — mahčyma: niehałosnyja śledčyja dziejańni, ahlad, kampjutarna-techničnaja ekśpiertyza.
Toje samaje sa ŭzłomam: kali siłavikam nie ŭdajecca rasšyfravać pierapisku, heta nie značyć, što ŭ niekatorych vypadkach jany nie zmohuć jaje atrymać.
U apošni čas maje padpisčyki stali źviartacca z vypadkami źjaŭleńnia inšych pryład u aktyŭnych siesijach Telegram, jakich jany nie dadavali, piša ŭkrainski ekśpiert pa infarmacyjnaj biaśpiecy Mikita Knyš. Jak viadoma, bolšaść papularnych miesiendžaraŭ padtrymlivajuć mahčymaść padłučeńnia niekalkich pryład da adnaho akaŭnta dla zručnaści znosin.
Da prykładu, vy možacie vykarystoŭvać Telegram adnačasova na kampjutary i na telefonie. Pry hetym sakretnyja čaty (zialonyja z zamočkam) buduć adlustroŭvacca tolki na adnoj pryładzie, a inšyja (supołki, kanały i zvyčajnyja čaty) sinchranizujucca lustrana na abiedźviuch pryładach.
Voś takija «lusterki» stali časta źjaŭlacca ŭ bujnych biznesmienaŭ, palitykaŭ i miedyja-aktyŭnych ludziej. Čamu tak adbyłosia i chto ich ŭzłamaŭ? Ničoha novaha nie adbyłosia, hetaje pytańnie kamientavaŭ sam Pavieł Duraŭ. Miechanizm prosty.
1. Pierachop SMS śpiecsłužbami roznymi sposabami.
2. Uvachod u akaŭnt na novaj pryładzie abo veb-viersii Telegram.
3. Skid dvuchfaktarnaj aŭtentyfikacyi praz pryviazanuju poštu.
4. Pošta «adkryvajecca» šlacham pryjomu taho ž SMS praz knopku «Zabyŭsia parol» (vam pašancuje, kali numary nie supadajuć).
5. Zachodzim u poštu i ŭvodzim kod u Telegram.
6. U nas adkryvajucca ŭsie čaty, hrupy i niavydalenaja pierapiska, za vyklučeńniem sakretnych čataŭ (zialonych čataŭ z zamočkam).
Ci zakonnyja takija mietady, adkažuć jurysty. Jak nie dapuścić takich situacyj?
1. Nie vykarystoŭvać adnolkavyja numary ŭ miesiendžarach, sacyjalnych sietkach i paštovych servisach. U ideale — vykarystoŭvać zamiežnyja numary, na jakija aktyvujucca miesiendžary. Pry hetym aktyvacyja pavinna być nie ŭ krainie pražyvańnia, to bok aktyvavać miesiendžary lepš za ŭsio za miažoj.
2. Nie zabyvać raz na paŭhoda papaŭniać i ŭklučać za miažoj telefonny numar, na jakija pryviazanyja miesiendžary i paštovyja akaŭnty, kab sim-kartu nie pieravypuścili i numar nie pierajšoŭ novamu čałavieku.
3. Vykarystoŭvać dvuchfaktarnuju aŭtentyfikacyju praz dadatak Google Authenticator i adviazać (vydalić z paštovaha akaŭnta) mabilny numar.
4. Nadrukavać i vykarystoŭvać «reziervovyja kody» (dastupna ŭ Google) jak sposab adnaŭleńnia dostupu ŭ vypadku straty parola.
5. Vykarystoŭvać nadziejnaha paštovaha pravajdara (Google, ProtonMail).
Adkładać hetyja dziejańni vielmi niebiaśpiečna.
