Pašynian: Pryznačeńnie hienieralnaha sakratara ADKB biez zhody Armienii budzie značyć, što ADKB nie isnuje
kremlin.ru
Abmierkavańnie pa pytańni pryznačeńnia novaha hienieralnaha sakratara Arhanizacyi Damovy ab kalektyŭnaj biaśpiecy praciahvajecca, novy hienieralny sakratar ADKB nie budzie pryznačany biez zhody Jerevana, i armianski bok zajmaje pa hetym pytańni kanstruktyŭnuju pazicyju, zajaviŭ premjer-ministr Armienii Nikoł Pašynian, piša «Interfaks».
«Nie moža być pryznačeńnia biez udziełu i zhody Armienii. Heta budzie aznačać, što ADKB nie isnuje», — skazaŭ Pašynian na pres-kanfierencyi ŭ aŭtorak.
Pavodle jaho słoŭ, pazicyja Jerevana pa pytańni pryznačeńnia novaha hienieralnaha sakratara ADKB «vielmi kanstruktyŭnaja».
«My ličym, što hety termin naš. Našy partniory nie zhodnyja, kažuć, što hetaje pytańnie nie adrehulavana. My kažam, što tady da pryznačeńnia novaha hienieralnaha sakratara davajcie ŭ statucie ADKB udakładnim: kali pa niejkich pryčynach termin zastajecca niezavieršanym, to jak pavinna rehulavacca pytańnie? I, zdajecca, my pryjšli da zhody pa hetym punkcie».
Vakansija hienieralnaha sakratara ADKB utvaryłasia paśla taho, jak Armienija daterminova adklikała svajho pradstaŭnika Juryja Chačaturava, jaki adpracavaŭ na hetaj pazicyi tolki paŭtara hoda z troch.
Armienija nastojvaje, kab i nastupnyja paŭtara hoda hienieralnym sakratarom ADKB byŭ pradstaŭnik jaje krainy.
Minsk prapanavaŭ na miesca staršyni Stanisłava Zasia — dziaržsakratara Rady biaśpieki. Jon atrymaŭ padtrymku ad astatnich kiraŭnikoŭ dziaržaŭ, jakija ŭvachodziać u ADKB, ale tolki nie ad Armienii.
